23 مامىردان  باستاپ،  «قازاقستان» ۇلتتىق تەلەارناسىنان «قىزىل الما» اتتى تەلەحيكايا ەفيرگە جول تارتادى دەپ حابارلايدى قامشى اقپاراتتىق اگەنتتىگى.   «قىزىل الما» تەلەحيكاياسىنىڭ العاشقى كورسەتىلىمى  سەيسەنبى كۇنى 21:45-تە باستالادى.

       بۇل تۋىندى قازىرگى قوعامدا، اسىرەسە الەۋمەتتىك ورتادا ءجيى كەزدەسەتىن ادامدار اراسىنداعى  قاراما-قايشىلىقتار، بىر-بىرىنە دەگەن جىلى سەزىمدەرى مەن سەنىمدەرىنىڭ جوعالۋى، ساتقىندىق، اتا-انا مەن باۋىرعا دەگەن قۇرمەتتىڭ تومەن دەڭگەيگە ءتۇسىپ كەتكەندىگى جايىنداعى تاقىرىپتار قوزعالادى.

        وقيعا جەلىسى بويىنشا، تۋعان اعاسى ءبىرجاننان قاپىدا ايرىلىپ قالعان رۇستەم، بۇرىنعى قازاقتىڭ سالتى بويىنشا امەڭگەرلىكتى قولعا الىپ، جەڭگەسىنە ۇيلەنەدى. رۇستەمگە دۇنيەدەن ەرتە وتكەن اكەسىنىڭ شەبەرلىك ونەرى دارىعان ەكەن. وسى كاسىبى ارقىلى، نانىن تاۋىپ، كۇنىن كورىپ جۇرگەن ازامات. ونىڭ قولىنان شىققان ساندىقتارى قولونەر تۋىندىسىنداي كوركەم بولعانىمەن، جانۇياسىنىڭ اۋقاتتى ءومىر سۇرۋىنە جەتە بەرمەيدى.  

       بۇل تەلەحيكاياداعى كەيىپكەرلەردىڭ جان  كۇيزەلىسى، ءومىر وتكەلدەرىنىڭ سان قيلى سىناقتارى كورەرمەندى بەي-جاي قالدىرمايتىنى انىق. ەڭ باستىسى، قانداي دا قيىنشىلىقتارعا قاراماستان، وتباسىن ساقتاپ قالۋ، قازىرگى تاڭدا اكتۋالدى تاقىرىپتىڭ ءبىرى ەكەنى ءسوزسىز.