ەۋرووداق شتاب پاتەرى سانالاتىن بريۋسسەلدە قازاقستان پرەزيدەنتى نۇرسۇلتان نازاربايەۆ پەن ەۋروكوميسسيا ءتوراعاسى جوزە مانۋەل بارروزۋ كەزدەسۋ وتكىزۋدە.
كەزدەسۋ جوسپارىنا ساي، اڭگىمە بارىسىندا تاراپتار قازاقستان مەن ەۋرووداق اراسىنداعى ىنتىماقتاستىق پەن كەڭەيتىلگەن ارىپتەستىك تۋرالى جاڭا كەلىسىمگە قول قويۋ تۇرعىسىندا ەكىجاقتى ىنتىماقتاستىق ماسەلەلەرىن تالقىلايدى. سونداي-اق، حالىقارالىق كۇن تارتىبىندەگى وزەكتى ماسەلەلەر، سونىڭ ىشىندە ۋكرايناداعى جاعداي بويىنشا پىكىر الماسادى. ەۋروپالىق وداق - قازاقستاننىڭ نەگىزگى ساياسي، ەكونوميكالىق، ساۋدا جانە ينۆەستيسيالىق سەرىكتەستەرىنىڭ ءبىرى. بۇل كورسەتكىش بويىنشا ول رەسەي مەن قىتايدان وزىق تۇر. قازاقستاننىڭ سىرتقى ساۋدا اينالىمىنىڭ جارتىسىنان استامى جانە ەلىمىزدىڭ ەكونوميكاسىنا تارتىلعان شەتەلدىك كاپيتالدىڭ 49 پايىزى ەۋرووداق ۇلەسىندە. وپەك-كە مۇشە ەمەس ەلدەر اراسىندا قازاقستان - رەسەي مەن نورۆەگيادان كەيىنگى ەۋروپاعا ەنەرگيا تاسىمالدايتىن ءۇشىنشى ءىرى مەملەكەت. قازاقستاننىڭ ەۋرووداق ەلدەرىمەن قارىم-قاتىناسى قايشىلىقسىز سيپاتتا جانە ۇزدىكسىز نىعايىپ كەلەدى.
سونداي-اق، بۇگىن پارلامەنت سەناتىنىڭ جالپى وتىرىسىندا ق ر ۇلتتىق ەكونوميكا ءمينيسترى ەربولات دوسايەۆ قازاقستاننىڭ دسۇ-عا مۇشە بولۋىنا از ۋاقىت قالعانىن حابارلادى. بيىل، 4 مامىردا ازيا دامۋ بانكى باسقارۋشىلار كەڭەسىنىڭ 47ء-شى جىل سايىنعى وتىرىسىندا پرەزيدەنت نۇرسۇلتان نازاربايەۆ: «ءبىز قازاقستاننىڭ دۇنيەجۇزىلىك ساۋدا ۇيىمىنا كىرۋىنە قاتىستى كەلىسسوزدەر ۇدەرىسىن اياقتاۋعا جاقىنبىز. تولىق مۇشەلىك وسى جىلى ورىن الادى دەپ ءۇمىت ارتامىز»، - دەگەن بولاتىن.
سونىمەن قاتار، بۇگىن پارلامەنت سەناتى «ەاەو كەلىسىمى» تۋرالى شارتتى راتيفيكاسيالادى. 1 قازانداعى ءماجىلىستىڭ ماقۇلداۋىنان سوڭ سەنات تا «ەاەو كەلىسىمى» كوپ تالقىلاپ جاتپادى. ءدال بۇگىن، قازاقستانمەن قاتار بەلارۋس پارلامەنتى دە ەۋرازيالىق وداقتىڭ كەلىسىم-شارتىن راتيفيكاسيالادى. ەۋرازيالىق ەكونوميكالىق وداق قۇرۋ تۋرالى شارت بيىل، 29 مامىردا استانادا قابىلدانعان بولاتىن.
الەمدىك ەكونوميكا تۇرعىسىنان دسۇ اۋقىمدى جانە اۋديتورياسى كەڭ ۇيىم. ەۋرووداق بولسا ەۋروپالىق مەملەكەتتەر ءۇشىن ورتاق دامۋ ستراتەگياسى قالىپتاسقان قۋاتتى ەكونوميكالىق وداق. ال، جاڭا قۇرىلىپ جاتقان ەاەو - ەۋرووداقپەن باسەكەلەسۋدى وزىنە مىندەتتەيدى. وداققا مۇشە ەلدەر ورتاق ءوندىرىستى دامىتۋ مەن ەۋرازيالىق نارىقتى بىرگە يەلەنۋگە تالپىنىپ جاتىر. اتالعان ۇيىمعا قىرعىزستان مەن ارمەنيانىڭ دا مۇشە بولۋ ءوتىنىشى قارالۋدا.
ەۋرووداقپەن كەڭەيتىلگەن ارىپتەستىك نەمەسە دسۇ مۇشەلىگىندەگى قازاقستان، سونداي-اق ەاەو مۇشەلىگىندەگى قازاقستان. بۇلار قازاقستاننىڭ قاي ۇيىمدا بولماسىن ءوز ۇپايىن جوعالتپاۋعا جاسالىپ جاتقان ارەكەتتەرى مە؟ قازاقستان ازىرگە جوعارىداعى ەكونوميكالىق وداقتاردىڭ بىرەۋىنە دە مۇشە ەمەس. دەسەك تە قازاق ەلى وسى باعىتتاردىڭ ەشقايسىسىندا قالىس جۇمىستار ىستەپ جاتپاعان سىڭايلى. سولاي بولا تۇرا، رەسەيمەن قازاقستان اراسىنداعى ساۋدا ارىپتەستىگى اناعۇرلىم دامىعان. ال، بۇگىن دسۇ تۋرالى ءسوز قوزعاعان ەربولات دوسيەۆ: «قازاقستاننىڭ دسۇ-عا كىرۋى ماسەلەلەرىندە دسۇ-عا قوسىلعان رەسەي تاراپىنان ورىن العان كەدەرگىلەر ەڭسەرىلدى» دەدى. ول قانداي كەدەرگىلەر بولۋى مۇمكىن؟ ۋكراينادا مەن رەسەي اراسىنداعى جاعدايدان كەيىن الەمدىك ساياساتكەرلەردىڭ كوبى پۋتين بيلىگىندەگى رەسەيگە سىن كوزبەن قاراعان ەدى. ولاردىڭ ىشىندە ەۋروپارلامەنت ساياساتكەرلەرى تۇگەلدەي پۋتينگە اۋىر سىندار ايتقان بولاتىن. قۇرامىنا رەسەي قاتىسقان ەاەو ۇيىمىنا مۇشە بولۋعا قازاقستاننىڭ جاساعان ارەكەتى قوعامدا ءتۇرلى پىكىرلەر تۋعىزىپ، كوپ تالقىلاندى. ءدال وسى رەتتە، قازاقستان مەن ەۋرووداق اراسىنداعى ىنتىماقتاستىق پەن كەڭەيتىلگەن ارىپتەستىك تۋرالى جاڭا كەلىسىمگە قول قويىلۋى نەنى اڭعارتادى؟ قازاقستاننىڭ الداعى ەكونوميكالىق قادامدارى وزگەرۋى مۇمكىن بە؟ بۇل سۇراقتارعا وقىرمانمەن بىرگە جاۋاپ ىزدەمەكپىز.
