كوكتەمگى سۋ تاسقىنى كەزىندە ماحامبەت اۋدانىنداعى ءۇيى قيراپ قالعان تاعى ءبىر وتباسى باسپانالى بولدى. باس ءمۇفتي ەرجان قاجى مالعاجى ۇلى كەشە ساعىنىش توباجانوۆاعا "نۇر اقتوبە" اۋدانىنان ەكى بولمەلى پاتەردىڭ كىلتىن تابىس ەتتى، دەپ حابارلايدى قامشى اقپاراتتىق اگەنتتىگى ءدىني باسقارمانىڭ رەسمي سايتىنا سىلتەمە جاساپ.

ەكى بولمەلى پاتەر ماڭعىستاۋ، وڭتۇستىك، باتىس قازاقستان، اتىراۋ، قىزىلوردا، قوستاناي جانە اقتوبەدەگى وبلىستىق مەشىتتەردە جينالعان اسار اقشاسىنا ساتىپ الىنعان. ەلىمىزدىڭ باس ءمۇفتيى ەرجان قاجى مالعاجى ۇلى بۇگىن بۇل شاڭىراقتا قوناق بولدى. توباجانوۆتار اۋلەتى تاسقىنعا دەيىن ماحامبەت اۋدانىندا ءۇش بولمەلى ۇيدە تۇرعان. باسپانانى سۋ شايىپ، قيراپ قالدى. تۇرۋعا جارامسىز. نە جەردىڭ، نە پاتەردىڭ كەزەگىندە جوق ءارى مۇگەدەك ادامى بار وتباسىعا "قازاقستان مۇسىلماندارى ءدىني باسقارماسى اسارى" قورى قول ۇشىن سوزدى. جيھازدارمەن جابدىقتالعان دايىن پاتەر سىيلادى. ازىق-تۇلىگىن اكەلىپ بەردى. ايتا كەتەيىك، اقتوبەدەگى سۋ تاسقىنى كەزىندە 86 ءۇي قۇلادى. 65 ادامعا جەر ۇچاسكەسى بەرىلدى. سەگىز جانۇيا ۋاقىتشا الەۋمەتتىك جاتاقحاناعا ورنالاستىرىلدى. ەكى وتباسىعا "باتىس-2" اۋدانىنان، بەسەۋىنە "نۇر اقتوبە" اۋدانىنان پاتەر بەرىلدى. تاعى ءبىر جانۇياعا مۇعالجارلىق كاسىپكەر ءۇي سىيلادى.