قازاقستان رەسپۋبليكاسى ۇلتتىق بانكى باسقارماسىنىڭ № 78  قاۋلىسىمەن  22 مامىردان 15 ماۋسىمعا دەيىن  «Delta Bank» اق-تىڭ  جەكە  جانە  زاڭدى  تۇلعالاردىڭ  دەپوزيتتەرىن  قابىلداۋعا،  جەكە  جانە  زاڭدى  تۇلعالاردىڭ  بانك  شوتتارىن اشۋعا ليسەنزياسى  توقتاتىلا تۇرادى، دەپ حابارلايدى قامشى اقپاراتتىق اگەنتتىگى ق ر ۇلتتىق بانكىنىڭ باسپا ءسوز قىزمەتى تاراتقان اقپاراتقا سۇيەنىپ. 

بۇل شەشىمدى ق ر ۇب اتالعان بانك «قازاقستان رەسپۋبليكاسىنداعى بانكتەر جانە بانك قىزمەتى تۋرالى» زاڭى 48-بابىنىڭ 1-تارماعى ۆ) جانە گ) تارماقشالارىندا كوزدەلگەن نەگىزدەر  بويىنشا، تولەم جانە اۋدارىم وپەراسيالارى بويىنشا شارتتىق مىندەتتەمەلەردى  ۇنەمى (قاتارىنان كۇنتىزبەلىك ون ەكى اي ىشىندە ءۇش جانە ودان كوپ رەت) تيىسىنشە ورىنداماۋ جانە ۇنەمى (قاتارىنان كۇنتىزبەلىك ون ەكى اي ىشىندە ءۇش جانە ودان كوپ رەت) پرۋدەنسيالىق نورماتيۆتەردى جانە باسقا دا ساقتالۋى ءتيىس مىندەتتى نورمالار مەن ليميتتەردى بۇزعانى ءۇشىن ىشكى باقىلاۋ جۇيەلەرىن جاقسارتۋ  قاجەتتىلىگى شەڭبەرىندە قابىلدادى.

ليسەنزيا  جاڭا  دەپوزيتتەردى تارتۋعا،  سونداي-اق  جەكە  جانە  زاڭدى  تۇلعالاردىڭ جاڭا  بانك  شوتتارىن اشۋعا  قاتىستى توقتاتىلا تۇرادى جانە  بانكتىڭ قولدانىستاعى دەپوزيتتەرى  مەن  كليەنتتەرىنە قىزمەت كورسەتۋىنە قاتىسى  جوق.

2017 جىلعى 1 مامىرداعى  جاعداي  بويىنشا  «Delta Bank» اق  جەكە  تۇلعالارىنىڭ  قابىلدانعان دەپوزيتتەرىنىڭ كولەمى 0،6 ملرد. تەڭگەنى، زاڭدى  تۇلعالاردىڭ دەپوزيتتەرى 115،7 ملرد. تەڭگەنى قۇرايدى.  بانكتىڭ دەپوزيتتىك پورتفەلىنىڭ ۇلەسى بانك  جۇيەسى دەپوزيتتەرىنىڭ  جيىنتىق كولەمىنىڭ 0،7%-ىن قۇرايدى.