16 مامىر كۇنى بولعان وقيعالاردان كەيىن كىشكەنتاي كريستينا اۋرۋحانادا تۋعان اناسىمەن كەزدەستى، دەپ حابارلايدى قامشى اقپاراتتىق اگەنتتىگى aktobetimes.kz باسىلىمىنا سىلتەمە جاساپ.
جەرگىلىكتى ءتىلشى بىرنەشە كۇن بۇرىن قۇرايلى اۋىلىندا ورىن العان جانتۇرشىگەرلىك وقيعاعا قاتىستى جاڭا دەرەكتەردى تاپتى.
«ناتاليا قيىن كۇندەردى باسىنان وتكەرىپ جاتقان. بىرنەشە ۋاقىت بويى تۇراتىن جەر تاپپاي، دوستارى مەن تانىستارىنىڭ ءۇيىن كەزەك-كەزەك پانالاپ ءجۇردى. مەنىڭ دە ۇيىمدە تۇردى. جاعداي ءتىپتى قيىنداپ كەتكەننەن سوڭ ناتاشا ۇلىن كىندىك شەشەسىنە قالدىرىپ، كىشكەنتاي قىزىن بالالار ۇيىنە الىپ بارعان. ول ۋاقىتتا ونىڭ اكەسى تۋبەركۋلەز اۋرۋىنا شالدىعىپ، اۋرۋحانادا جاتقان بولاتىن»، - دەيدى كريستينانىڭ اناسىنىڭ قۇربىسى.
ءبىر جارىم جىلداي سوندا ەمدەلىپ، كەيىننەن اۋرۋحانادان شىققاننان سوڭ قىزىن بالالار ۇيىنەن الىپ كەتپەك بولعان. ناتاليا مەن ءۆلاديميردى سازدينسك اۋدانىنداعى پوليسيا بولىمشەسىنە الىپ كەلگەن. قۇربىسىنىڭ ايتۋىنشا، كريستينا اكەسىمەن بىرگە تۇرۋى ءۇشىن اناسىنا بالادان باس تارتۋ جايىندا ءوتىنىش جازىپ بەرۋىن ۇسىنعان. كەيىننەن ناتاليانىڭ جاعدايى دۇرىستا باستاعاندا كىشكەنتاي قىزدىڭ وگەي شەشەسى مەن اكەسى اناسىمەن ءتىپتى تەلەفون ارقىلى دا بايلانىسقا شىعارماي، قىزىنا كەلىپ تۇرۋىنا تىيىم سالعان ەكەن.
16 مامىر كۇنى قىزىنىڭ اۋىر سوققىعا جىعىلعانىن ەستىگەننەن كەيىن ناتاليا ونى كورۋگە اۋرۋحاناعا كەلەدى.
«مەنى سەن بە تاستاپ كەتكەن؟» - دەگەن كريستينانىڭ سۇراعىنا اناسى: «مەن سەنى تاستاعان جوقپىن، تۋعان اكەڭنىڭ قولىنا تاپسىردىم» - دەپ جاۋاپ بەرگەن. كىشكەنتاي قىز تۋعان اناسىن مۇلدە تانىمايدى. بەلگىلى بولعانداي، اناسى مەن قىزى سوڭعى رەت كريستينا ءۇش جاسىندا بولعاندا جۇزدەسكەن ەكەن.
اۋدارعان: نازەركە لابيحان
