ۇلىبريتانيانىڭ مانچەستەر قالاسىندا اريانا گراندەنىڭ كونسەرتى كەزىندە جارىلىس بولدى، دەپ جازادى قامشى اقپاراتتىق اگەنتتىگى.

كۋاگەرلەر Manchester Arena ستاديونىندا ەكى جويقىن جارىلىستى ەستىگەن. سول كەزدە اريانا گراندە ساحنادا بولعان. قالا پوليسياسى جارىلىستىڭ بولعانىن جانە زارداپ شەگۋشىلەردىڭ بار ەكەندىگىن راستادى.

Daily Mail باسىلىمى حابارلاسقان كونسەرتكە كەلۋشىلەردىڭ ءبىرى وقىس وقيعانىڭ كۋاگەرى بولعان. ونىڭ ايتۋىنشا، گراندە ءانىن اياقتاعان ساتتە جارىلىستى ەستىگەن. «بارلىعى شۋلاپ كەتتى جانە سىرتقا ۇمتىلدى»، - دەيدى ەۆي بريۋستەر.

عيماراتقا كوپتەگەن جەدەل جاردەم كولىگى بەت العان. اريانا گراندەنىڭ وكىلى ءانشىنىڭ زارداپ شەكپەگەندىگىن ءمالىم ەتتى. الايدا ول ستاديوندا نە بولعانىن ايتا المادى.

الدىن الا اقپارات بويىنشا، 22 مامىر كۇنى ۇلىبريتانيانىڭ  مانچەستەر ستاديونىندا بولعان جارىلىستان قايتىس بولعان جانە زارداپ شەككەندەر قاتارىندا قازاقستان ازاماتتارى جوق، دەپ حابارلايدى ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ.

«لوندونداعى قازاقستان ەلشىلىگى جەرگىلىكتى قۇقىق قورعاۋ ورگاندارىمەن تىعىز  بايلانىستا. قازاقستان ازاماتتارىنا  ساق بولۋ جونىندە ەسكەرتۋلەر تاراتىلعان.

ەلشىلىكتىڭ كونسۋلدىق ءبولىمىنىڭ جەدەل جەلىسى ىسكە قوسۋلى: +44(0)7447470570 (WhatsApp). 

مانچەستەردەگى جاقىندارىڭىز، تۋىستارىڭىز نەمەسە دوستارىڭىزبەن بايلانىسىپ، ولاردىڭ ەسەن-ساۋ ەكەندىگىنە كوز جەتكىزۋلەرىڭىزدى سۇرايمىز»، - دەپ جازدى جايناقوۆ ءوزىنىڭ Facebook پاراقشاسىندا.

ق ر ءسىم مالىمدەگەندەي، جارىلىس بولعان الاڭدا قازاقستاندىق التى ستۋدەنت بولعان.

«ءبىزدىڭ ديپلوماتتارىمىز سولاردىڭ ەكەۋىمەن بايلانىس جاساپ، امان-ساۋ ەكەندىگىنە كوز جەتكىزدى. ولارعا ەشقانداي مەديسينالىق كومەك قاجەت ەمەس جانە دوستارىمەن بىرگە تۇراتىن جەرلەرىنە امان-ەسەن جەتكەن»، - دەيدى ق ر ءسىم باسپا ءسوز قىزمەتىنىڭ باسشىسى. 

شولۋشى: گۇلىم جاقان