2017 جىل مامىردىڭ 24 كۇنى گرەكيانىڭ احارنون قالاسىندا قازاقستان مەن گرەكيا اراسىنداعى ديپلوماتيالىق قاتىناستارىنىڭ 25-جىلدىعىنا وراي ق ر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق جانە «نوۆىي مير» جشس-سىمەن بىرلەسە تۇسىرىلگەن «اناعا اپارار جول» ءفيلمى كورسەتىلەدى دەپ حابارلايدى قامشى اقپاراتتىق اگەنتتىگى «قازاقفيلم» باسپا ءسوز قىزمەتىنە سىلتەمە جاساپ. مادەني ءىس-شارانى ەلىمىزدىڭ گرەكيا رەسپۋبليكاسىنداعى ەلشىلىگى، ق ر مادەنيەت جانە سپورت مينيسترلىگى جانە ش.ايمانوۆ اتىنداعى «قازاقفيلم» اق ۇيىمداستىرىپ وتىر.
رەجيسسەر اقان ساتايەۆ تۇسىرگەن فيلم ءومىردىڭ اۋىرتپالىعىنا توتەپ بەرگەن، قيىن قىستاۋ كۇندەرى سۇراپىل سوعىستىڭ مەحناتىن كورگەن باستى كەيىپكەردىڭ تاعدىرىن باياندايدى. وقيعانىڭ نەگىزگى جەلىسى قازاق حالقىنىڭ باسىنا تۇسكەن اۋىر كەزەڭدى – ۇجىمداستىرۋ، جۇت، سوعىس جانە سوعىستان كەيىنگى جىلداردى قامتيدى.
ەستەرىڭىزگە سالا كەتسەك، اتالعان تاريحي تۋىندى 38ء-شى حالىقارالىق ماسكەۋ كينوفەستيۆالىندە جانە «ەۋرازيالىق كوپىر» اتتى فەستيۆالگە قاتىسىپ، باس جۇلدەنى، سونىمەن قاتار اكتريسا التىناي نوگەربەك «ۇزدىك ايەل ادام ءرولى» نوميناسياسىندا جەڭىسكە جەتتى. ودان بولەك، بۇل تۋىندى بيىل قازاقستان كينوسىنشىلار اسسوسياسياسى ۇيىمداستىرعان «سىنشىلار تاڭداۋى» جۇلدەسىندە ءۇش بىردەي جۇلدەنى يەمدەندى. اتاپ ايتساق، «ەڭ ۇزدىك اكتريسا» - التىناي نوگەربەك؛ «ەكىنشى پلانداعى ۇزدىك اكتريسا» ارۋجان جازىلبەكوۆا؛ «فيلمگە جازىلعان ۇزدىك مۋزىكا» نوميناسياسىن اتالمىش ءفيلمنىڭ كومپوزيتورلارى ءالىم زايروۆ پەن رومان ۆيشنيەۆسكيي يەمدەندى. ودان بولەك، كينوتۋىندى جاقىندا عانا بىشكەكتە وتكەن «اق ءىلبىرىس» اتتى VI ۇلتتىق كينوجۇلدەسىندە ورتالىق ازيانىڭ ۇزدىك ءفيلمى اتاندى.
«اناعا اپارار جول» ءفيلمى 24 مامىردا ساعات 19:00-دە احارنون اكىمدىگى زالىندا كورسەتىلەدى. كىرۋ تەگىن.
«اناعا اپارار جول»
فيلم تۋرالى: ءفيلمنىڭ جەلىسى قازاق حالقىنىڭ حح عاسىردا باستان كەشكەن كۇردەلى تاريحي كەزەڭدەردەن قۇرىلعان، اتاپ ايتساق، كۇشتەپ جۇرگىزىلگەن ۇجىمداستىرۋ ناۋقانى، ۇلتتىڭ باسىنا تۇسكەن ۇلى تراگەديا – جۇت (اشارشىلىق)، ۇلى وتان سوعىسى جانە سوعىستان كەيىنگى بەينەتتى جىلدار. فيلم ءومىردىڭ اۋرتپاشىلىعىنا توتەپ بەرگەن، قيىن قىستاۋ كۇندەرى سۇراپىل سوعىستىڭ مەحناتىن كورگەن، جات ەلدە تۇتقىندا بولعان ءىلياس ەسىمدى جىگىتتىڭ تاعدىرىن باياندايدى. بوتەن جەردە ايداۋدا جۇرسە دە، جات ەلدىڭ زورلىق-زومبىلىعىن كورىپ، قياناتىن كەشسە دە، جالعىزدىقتىڭ تاۋقىمەتىن تارتسا دا، باس قاھارمان اتاجۇرتىن اڭساپ، اناسىن ساعىنىپ، تۋعان جەرىنە ورالاتىنىنا ەشقاشان كۇماندانبايدى.
