قىتايدا ۇيىندە جالعىز قالعان 5 جاسار بالا اكەسىنە تيەسىلى اقشانى تاۋىپ الىپ، جالپى سوماسى 500 مىڭ يۋاندىق كۋپيۋرالاردى اپ-ساتتە جىرتىپ تاستاعان.

 بۇل تۋرالى قامشى اقپاراتتىق اگەنتتىگى Sohu.com-عا سىلتەمە جاساپ حابارلايدى.

بۇل قاراجات شامامەن 10 مىڭعا جۋىق اقش دوللارىن قۇرايدى. ال جەرگىلىكتى بانكتەر جىرتىلعان كۋپيۋرالاردى جاڭاسىنا اۋىستىرىپ بەرۋدەن باس تارتقان. ونىڭ باستى سەبەبى، قاعاز اقشانىڭ بارلىعى جىرتىلىپ قالعان.  جاقىن ماڭداعى بانكتەردىڭ بارىعىنا جىرتىلعان قاعاز اقشامەن بارعان گاونىڭ ارەكەتى ءوز ناتيجەسىن بەرمەدى. 

 وقيعا سينداو قالاسىنا قاراستى شاندۋن پروۆينسياسىندا 20 مامىر كۇنى بولعان.

بانك قىزمەتكەرلەرى اقشانىڭ جىرتىلعانىنا بايلانىستى ايىرباستاۋدان باس تارتقان.  گاو الدىمەن جىرتىق 100 يۋاندىق اقشالاردى جەلىمدەپ بىرىكتىرمەك بولعان. بىرنەشە ۋاقىتتان كەيىن بۇل ويىنىڭ ءىس جۇزىندە مۇمكىن بولمايتىندىعىن تۇسىنگەن. سەبەبى كۋپيۋرالاردىڭ كوبى جارتىلاي ەمەس، 5-6 بولىككە ايىرىلعان بولىپ شىقتى. ال اقشانىڭ نەگىزگى بولىگى بىرنەشە ۇساق بولىككە جىرتىلىپ، بۇل از دەگەندەي، ءبارى ارالاسىپ شاتاسىپ كەتكەن ەكەن.

ناتيجەسىندە گاو بانكنوتتاردىڭ تەك ساناۋلى بولىگىن عانا قالپىنا كەلتىرە العان.

 ەر ادام بالاسىنىڭ ادەيى جاساماعانىن جانە ۇلىن بۇل ارەكەتى ءۇشىن قاتتى جازالامايتىنىن ايتتى.
 

شولۋشى: ايگەرىم تاۋباي