ەلىمىزدە 28 ماۋسىمدا وتەتىن پارلامەنت سەناتى دەپۋتاتتارىن سايلاۋعا رەسپۋبليكالىق بيۋدجەتتەن 92 ملن. تەڭگە ءبولىندى، دەپ حابارلايدى قامشى اقپاراتتىق اگەنتتىگى khabar.kz-كە سىلتەمە جاساپ. 

بۇل قارجى كانديداتتاردىڭ تەلەديدار مەن راديو، باسپاسوزدە اقپاراتتىق ناسيحات باعدارلاماسىن بايانداۋعا جانە سايلاۋالدى ءىس-شارالارىن وتكىزۋگە جۇمسالادى. بۇل تۋرالى بۇگىن ورتالىق سايلاۋ كوميسسياسىنىڭ كەڭەسىندە ايتىلدى.

سەنات دەپۋتاتتارىن سايلاۋدا شەتەلدىك ب ا ق وكىلدەرى مەن حالىقارالىق ۇيىمداردىڭ قىزمەتىن ۇيىمداستىرۋ ءسوز بولدى. ورتالىق سايلاۋ كوميسسياسىنىڭ ءتوراعاسى بەرىك يماشيەۆ ەكىجاقتى بايلانىس ورناعان شەت ەلدەردىڭ ءتيىستى ورگاندارىنا شاقىرۋ حاتتارى جىبەرىلگەنىن ايتتى.

  مارات سارسەمبايەۆ، ورتالىق سايلاۋ كوميسسياسىنىڭ مۇشەسى: - شەت مەملەكەتتىڭ، حالىقارالىق ۇيىمنىڭ بايقاۋشىسىنا، سونداي-اق شەتەلدىك بۇقارالىق اقپارات قۇرالدارىنىڭ وكىلىنە ءبىر اۋدارماشى ءوزىنىڭ جەكە باسىن كۋالاندىراتىن قۇجاتىن كورسەتكەن كەزدە ىلەسىپ جۇرە الادى. ەكىنشى تارماق: شەت مەملەكەت، حالىقارالىق ۇيىم بايقاۋشىسىنىڭ قوسا بەرىلىپ وتىرعان ساۋالناماسىنىڭ ءماتىنى بەكىتىلسىن. ءۇشىنشى تارماق: شەت مەملەكەتتەردىڭ، حالىقارالىق ۇيىمدار بايقاۋشىلارىن اككرەديتتەۋدى جۇرگىزۋ 2017 جىلعى 12 ماۋسىمدا اياقتالسىن.

شولۋشى: ايگەرىم تاۋباي