1 ماۋسىمنان باستاپ ديزەل وتىنىن ساتۋعا اكسيزدەردىڭ كوتەرىلۋىنە بايلانىستى جانار-جاعار ماي باعاسى وسەدى، دەپ جازادى قامشى اقپاراتتىق اگەنتتىگى. بۇل تۋرالى «قازمۇنايگاز» اق-نىڭ باسپا ءسوز قىزمەتى حابارلايدى.

«بۇل شەشىم ەگىس ناۋقانى كەزىندە اۋىل شارۋشىلىعى تاۋارلارىن وندىرۋشىلەرگە سۋبسيديالانعان ديزەل وتىنىنىنىڭ ارزان باعامەن بەرىلۋىن قامتاماسىز ەتتى.  قازىرگى كەزدە وتىن باعاسى ءىرى جانارماي بەكەتتەرىندە 135-136 تەڭگەدەن ساتىلىپ جاتىر. ال اگرايلەرگە ۇسىنىلعان باعا 122-128 تەڭگەنى قۇرادى"، - دەپ مالىمدەدى «قازمۇنايگاز ونىمدەرى» وكىلدەرى.

قازىرگى تاڭدا قازاقستانداعى ءىرى جانارماي بەكەتتەرى جەلىلەرىندە ديزەل وتىنىنىڭ ءليترى 135-136 تەڭگە بولىپ تۇر. ال اگرارشىلار ءۇشىن ليترىنە 122-128 تەڭگە دەڭگەيىندە باعا بەلگىلەنگەن بولاتىن.

سونىمەن بىرگە، «بەنزين (اۆياسيالىق بەنزيندى قوسپاعاندا) مەن ديزەل وتىنىنا ارنالعان اكسيز مولشەرلەمەلەرىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2015 جىلعى 13 ناۋرىزداعى № 133 قاۋلىسىنا وزگەرىس ەنگىزۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 ناۋرىزداعى № 144 قاۋلىسىنا سايكەس 2017 جىلدىڭ 1 ماۋسىمىنان باستاپ ديزەل وتىنىن ساتۋعا اكسيز مولشەرلەمەسى تونناسىنا 9300 تەڭگەنى قۇرايدى.

قازاقپاراتتىڭ مالىمەتىنە سۇيەنسەك، اكسيزدىڭ ۇلعايۋى ەسەبىنەن عانا كوتەرمە باعانىڭ ءوسۋى شامامەن ليترىنە 7،3 تەڭگەنى قۇرايدى، بۇل جقس (جانارماي قۇيۋ ستانسيالارى) جەلىلەرىندەگى باعاعا اسەرىن تيگىزەدى. ديزەل وتىنى مەن بەنزيننىڭ باعاسىن بىرتە-بىرتە تەڭەستىرۋ - نارىق تەندەنسيالارىنىڭ ءبىرى. كوپتەگەن ەلدەردە ديزەل وتىنى مەن بەنزيننىڭ باعاسى بىردەي.

مىسالى، كورشى رەسەيدە بۇل مۇناي ونىمدەرىنىڭ باعالارى ليترىنە 208-209 تەڭگەنى قۇرايدى. سونىمەن قاتار، ءوندىرۋ مەن تۇتىنۋ كولەمدەرىنىڭ، قورلار ديناميكاسىنىڭ، ق ر نارىعىنداعى جانە رف يمپورتىنىڭ كوتەرمە باعالارىنىڭ وزگەرۋى كەلەشەكتە مۇناي ونىمدەرىنىڭ جەكەلەگەن تۇرلەرىنە بولشەك باعالاردىڭ وسۋىنە اسەر ەتۋى مۇمكىن. 

شولۋشى: گۇلىم جاقان