وسى جىلدىڭ 8 اقپانى كۇنى قىتايدان قازاق ەلىنە كوشىپ كەلە جاتىپ، «مايقاپشاعاي» كەدەندىك باقىلاۋ بەكەتىندە 59،900 اقش دوللارى كەدەنشىلەر تاراپىنان تاركىلەنگەن جەسىر انا گۇلجان ءماۋىتحانقىزىنا قاتىستى اپەللياسيالىق سوت وتىرىس 1ء-شى ماۋسىم كۇنى وسكەمەن قالاسىندا وتەدى، دەپ حابارلايدى قامشى اقپاراتتىق اگەنتتىگى Baq.kz پورتالىنا سىلتەمە جاساپ.

كۇللى ەلدىڭ قارسىلىعىن تۋدىرعان بۇل وقيعاعا بايلانىستى العاشقى سوت وتىرىسى زايسان قالاسىندا 17 ناۋرىزدا وتكەن بولاتىن. شىعىس قازاقستان وبلىسى زايسان اۋداندىق سوتى جالعىزباستى ايەلدى 234-باپ بويىنشا ايىپتى دەپ تانىعان. سونداي-اق، 68 مىڭ تەڭگە ايىپپۇل سالىپ، قالعان 40 مىڭ دوللاردى مەملەكەتكە كىرىس رەتىندە شەشكەن ەدى.

ول شەشىمگە نارازى بولعان جالعىزباستى انا اپەللياسيالىق سوتقا شاعىم ءتۇسىردى.

قازاق قوعامىندا زور ءدۇمپۋ تۋدىرعان اتىشۋلى بۇل وقيعاعا كۇللى جۇرت نازار اۋدارىپ وتىرعانى بەلگىلى. اسىرەسە، وزگە ەلدەردەن اتاجۇرتقا ورالۋدى ماقسات ەتكەن سان مىڭداعان قانداستاردىڭ وسى وقيعادان سوڭ، بۋۋلى تەڭدەرىن قايتا شەشىپ، ويلانىپ، قورقاقتاپ قالعانى جاسىرىن ەمەس.

«اپەللياسيالىق سوت وڭتايلى شەشىم شىعارىپ، ءوز اقشامدى وزىمە قايتارار دەپ ۇمىتتەنەمىن. ال، ول اقشا قولىما تيمەسە، ەكى بالام مەن كەلىنىمدى، ءىنىمدى، ونىڭ بالا-شاعاسىن قوسقاندا 8 ادام باسپاناسىز، تيىنسىز دالادا قالعالى تۇرمىز»، – دەيدى جەسىر انا.