تالدىقورعاندا جانرى مەن جازىلۋ ەرەكشەلىگى ءارقيلى 39 كىتاپتىڭ تۇساۋكەسەر ءراسىمى ءبىر مەزگىلدە ءوتتى،دەپ حابارلايدى قامشى اقپاراتتىق اگەنتتىگى.

جەتىسۋلىق اقىن-جازۋشىلاردىڭ 2017 جىلدىڭ I توقسانىندا الماتى وبلىسى اكىمىنىڭ قولداۋىمەن شىققان كىتاپتارىنىڭ تۇساۋكەسەرى تالدىقورعان قالاسىنداعى ءتىل سارايىندا ءوتتى. وقىرماندارعا ءتۇرلى مازمۇنداعى 39 كىتاپ تانىستىرىلدى. ولاردىڭ اراسىندا پوزيالىق، پروزالىق، عىلىمي جانە پۋبليسيستيكالىق كىتاپتار بار.

«جىرعا تۇنعان مەكەنىم - جەتىسۋىم» اتتى تۇساۋكەسەر شاراسىن وبلىس اكىمىنىڭ ورىنباسارى جاقسىلىق ومار جۇرگىزدى.

- مادەنيەت پەن ادەبيەتكە قامقورلىق جاساۋ ماقساتىندا مەملەكەت باسشىسى وسىدان 14 جىل بۇرىن «مادەني مۇرا» مەملەكەتتىك باعدارلاماسىن جۇزەگە اسىرۋدى تاپسىرعان بولاتىن. وسى باعدارلاما اياسىندا 2006 جىلدان بەرى  جەتىسۋ قالامگەرلەرىنىڭ كىتاپتارىن شىعارۋ داستۇرگە اينالىپ كەلەدى.  جىل سايىن وقىرمانعا جول تارتقان جاڭا جيناقتار ءوڭىردىڭ رۋحانياتىنا ۇلكەن ۇلەس بولىپ قوسىلىپ، جاس ۇرپاقتىڭ تانىمىن كەڭەيتۋگە ىقپال ەتىپ كەلەدى، - دەدى جاقسىلىق ومار.

سونىمەن قاتار وبلى اكىمىنىڭ ورىنباسارى وبلىس كىتاپحانالارىنا ەنگىزىلىپ جاتقان «ەلەكتروندى مەملەكەتتىك كىتاپحانا قورى» جوباسى شەڭبەرىندە شىعارىلعان كىتاپتاردىڭ ساندىق تاسپاعا ەنگىزۋ ءجۇرىپ جاتقانىن جانە باسقا دا اتقارىلعان جۇمىستارعا توقتالىپ ءوتتى.

مۇنان سوڭ «سەزىم سىرى» كىتابىنىڭ اۆتورى حاسەن كوپتىلەۋوۆ اق باتاسىن بەرىپ، قازاقستاننىڭ حالىق ءارتىسى، اكتەر نۇرجۇمان ىقتىمبايەۆپەن بىرگە كىتاپتاردىڭ لەنتاسىن قيدى.

تۇساۋى كەسىلگەن كىتاپ اۆتورلارى ءوزارا پىكىر الماسىپ، ويلارىن ورتاعا سالدى. ولاردىڭ قاتارىندا قازاقستان سۋرەت اكادەمياسىنىڭ پرەزيدەنتى امانقوس اقانايەۆ، «كارتينالار توپتاماسى» فوتوالبومىنىڭ اۆتورى مارات ءنۇسىپوۆ، «جەڭىس - پوبەدا» كىتابىنىڭ اۆتورى ۆيكتور نيكيتين، «ايقاباق» كىتابىنىڭ اۆتورى امىرە ءارىن، سول سياقتى «تاۋ مەن وزەن بايانى»، «جەتىسۋعا قۇيىلعان جىلعالار» اتتى جيناق كىتاپتارىنىڭ قۇراستىرۋشىلارى ەرلان ءجۇنىس، ەسبولات ايدابوسىن جانە باسقالارى بار. ءسوز سويلەگەندەر الماتى وبلىسىندا ادەبيەتتىڭ دامۋىنا ەرەكشە كوڭىل بولىنەتىنىن اتاپ ءوتىپ، كىتاپ شىعارۋعا كورسەتىلگەن قولداۋلار ءۇشىن ريزاشىلىقتارىن ءبىلدىردى.

شولۋشى: ايگەرىم تاۋباي