بيىل ۇلتىمىزدىڭ اردا ازاماتتارىنىڭ ءبىرى، مەملەكەت جانە قوعام قايراتكەرى ساكەن سەيفۋلليننىڭ تۋعانىنا 120 جىل. ايتۋلى مەرەكە استانا تورىندە اتاپ ءوتىلدى. بۇل شاراعا مۇرىندىق بولعان ەلوردادا ورنالاسقان ساكەن سەيفۋللين مۋزەيى. بۇل تۋرالى قازاقپارات حابارلادى.

استانا قالاسىندا اتالعان مۋزەيدىڭ تىكەلەي ۇيىمداستىرۋمەن ءداستۇرلى «ساكەن وقۋلارى» بايقاۋى ءوتىپ جاتادى. بۇل شارا بيىل دا ءوز ىزىنەن جاڭىلمادى. استانا قالاسى بويىنشا 70-تەن استام مەكتەپ قاتىسىپ، 100-گە تاياۋ جاس ۇرپاق ءتورت نوميناسيا بويىنشا ب ا ق سىنادى.  ساكەننىڭ اقىندىق قىرىن اشاتىن «سىر ساندىقتى اشىپ قارا» نوميناسياسى بويىنشا جۇزدەن جۇيرىك، مىڭنان تۇلپارلار سارالاندى. اقىننىڭ ولەڭىن مانەرلەپ وقۋدا الدىنا جان سالماعان №40 مەكتەپتىڭ 9- سىنىپ وقۋشىسى ەمانعالييەۆا كاميلا بولدى. №6 مەكتەپ-گيمنازياسىنىڭ 11- سىنىپ وقۋشىسى مۋسحانوۆ ءدميترييدىڭ ءتىلى جاتىق، ولەڭدى شىنايى وقىعاندىعى ءۇشىن ەكىنشى ورىندى يەلەندى. ال №48 ورتا مەكتەپتىڭ 7-سىنىپ وقۋشىسى مىقتىبەك ءادىل ءۇشىنشى ورىندى ەنشىلەسە، ىنتالاندىرۋ سىيلىعىمەن №24 ورتا مەكتەپتىڭ 7-سىنىپ وقۋشىسى ماققابي فاريزا ماراپاتتالدى.  ساكەننىڭ اقىندىق قىرىمەن بىرگە قالامگەرلىك قۋاتىن ايگىلەيتىن «قازاقتى قازاق دەيىك» پروزالىق شىعارمالارىنان ءۇزىندى وقۋ نوميناسياسى بويىنشا وزا شاپقاندار №37 مەكتەپتىڭ وقۋشىسى ورىنباساروۆا ايگەرىم – ءبىرىنشى ورىن، №63 ورتا مەكتەپ وقۋشىسى ەلەمەس ەربولات – ەكىنشى ورىن، №70 مەكتەپتىڭ 7-سىنىپ وقۋشىسى قۋانىش جاقسىلىق ءۇشىنشى ورىنعا تابان تىرەدى. ىنتالاندىرۋ سىيلىعى №66 مەكتەپتىڭ 7-سىنىپ وقۋشىسى احمەتقالييەۆا ايگەرىمگە بۇيىردى. «ارقانىڭ كەربەز سۇلۋ كوكشەتاۋى» نوميناسياسى ساكەننىڭ اندەرىنە ارنالدى. بۇل توپتان 1-ورىنعا №62 مەكتەپتىڭ 8-سىنىپ وقۋشىسى قادىربەرگەن ەلنۇر، №67 مەكتەپتىڭ وقۋشىلارى تاميرلان يسماكاتوۆ پەن راۋشان كەڭشىلىك قوس داۋىستا ءان شىرقاپ 2-ورىنعا يە بولدى. ال ءۇشىنشى ورىندى اسەم اۋەنىمەن №42 ورتا مەكتەپتىڭ 8-سىنىپ وقۋشىسى شاكيزينوۆ ابىلايحان الدى. ىنتالاندىرۋ سىيلىعىن №53 مەكتەپتىڭ وقۋشىسى ازات ينابات يەلەندى.  «ساكەننىڭ اماناتى» نوميناسياسى بويىنشا ساحنالىق كورىنىس كورسەتكەن №38 مەكتەپتىڭ وقۋشىسى جاشكەيەۆ قۋانىش ءبىرىنشى ورىن الدى. 2- ورىنعا №71 مەكتەپتەن كەلگەن «ماسكا» توبى يە بولدى. ال 3-ورىندى №9 «زەردە» مەكتەبىنىڭ 8-سىنىپ وقۋشىسى جۇماعۇلوۆ مارعۇلان قانجىعسىنا بايلادى. ىنتالاندىرۋ سىيلىعىن №48 مەكتەپ-ليسەيىنىڭ وقۋشى تىلەۋ ارۋجان الدى.  ادىلدىكتى تۋ ەتكەن كوميسسيا قۇرامىندا، ساكەننىڭ ناعاشى قارىنداسى اسىلگۇل ابىشيەۆا، جازۋشى تالعات كەڭەسباي جانە ساكەن سەيفۋللين مۇراجايىنىڭ عىلىمي قىزمەتكەرى ايگەرىم ماقاجانوۆا بولدى. كوميسسيا ءتوراعاسى – اقىن داۋلەتكەرەي كاپ ۇلى.  يگى شارانىڭ سوڭى ابەي-مۋزىكالىق كونسەرتكە ۇلاستى. «استانا» ۇلتتىق سۋرەت گالەرەياسىنىڭ كونسەرت زالىندا وتكەن كەشتى ق ر مەملەكەتتىك سىيلىعىنىڭ لاۋرەاتى، اقىن، ساكەن سەيفۋللين مۇراجايىنىڭ ديرەكتورى ن.ايت ۇلى اشتى. وسى كەشتە ساكەنگە بار عۇمىرىن ارناعان، ساكەن جايلى توم-توم زەرتتەۋ كىتاپتارىنىڭ اۆتورى، قازاقتىڭ قازىرگى ابىزى، عالىم تۇرسىنبەك كاكىش ۇلى ارنايى ءسوز الدى. استانا قالاسى اكىمدىگىنە العىس ايتا كەلىپ، وسىنداي ۇلى مەرەكەنى تويلاۋعا ەڭبەك ەتكەن ساكەن سەيفۋللين مۋزەيىنىڭ ۇجىمىنا ريزالىشىلىعىن ءبىلدىردى.  سونىمەن بىرگە ساكەن سەيفۋللين مۋزەيى قۇراستىرعان «ساكەن سەيفۋللين مۋزەيى» البومى مەن «سۇڭقار ساكەن» كىتابىنىڭ، امانتاي كاكەننىڭ «ساكەن تاعىلىمى» كىتابى سونداي-اق، اتاقتى عالىم تۇرسىنبەك كاكىش ۇلى قۇراستىرعان ساكەن سەيفۋللين شىعارمالارىنىڭ 13 تومدىعىنىڭ تۇساۋكەسەرى ءوتتى. ساۋىق-كەش ساكەننىڭ اندەرىنە ارنالدى. رەسپۋبليكاعا تانىمال ءداستۇرلى انشىلەر ەرلان رىسقالي، ەرجان بازاربەكوۆ، كلارا تولەنبايەۆا، داۋرەن اركەنوۆ، قاناپيا جۇكەنوۆ، مەرۋەت باشاي ءان شىرقادى. كونسەرتى اقىن، اكتەر، ءداستۇرلى ءانشى، ساكەن سەيفۋلليندى ناسيحاتتاۋشى قانات ءجۇنىسوۆ جۇرگىزدى. ساكەن رۋحىنا تاعزىم ەتە كەلگەن ءقادىرلى قوناقتارعا قوناقاسى بەرىلدى.

قامشى-اقپارات