«ءبىزدىڭ ەلىمىز بەن وزبەكستان اراسىنداعى ساۋدا كولەمى جىل سايىن ارتۋدا، سونىڭ ىشىندە كورشىلەرىمىز بىزدەن ميللياردتاعان دوللاردىڭ ونىمدەرىن ساتىپ الادى. ەكى ەلدىڭ اراسىندا ەركىن ساۋدا جاساۋ جونىندە مەملەكەت باسشىلارى 1997 جىلى قول قويعان كەلىسىم بار. وندا ەكى جاق تا شەكارا ارقىلى وتەتىن ەكسپورت نەمەسە يمپورت تاۋارلارعا ەشقانداي كەدەندىك نەمەسە باسقا دا الىم-سالىق سالمايمىز دەپ كەلىسكەن. الايدا...

الايدا وزەكەڭدەر سوعان قاراماي قازاقستاننان ەنگەن تاۋارلارعا ءبىرجاقتى سالىق سالىپ، ولاردىڭ باعاسىن كوتەرۋ ارقىلى يمپورتتى شەكتەۋ ساياساتىن جۇرگىزىپ وتىر»، - دەپ ءماجىلىستىڭ سوڭعى وتىرىسىندا دەپۋتات نۇرلان جازىلبەكوۆ دابىل قاقتى.

ءوزىنىڭ سوزىندە دەپۋتات وزبەك جاعى قازاقستاننان ەنگەن تاۋارلارعا اكسيز سالىعىن سالاتىنىن ايتتى. ادەتتە بۇل سالىق قوعامدىق ءقاۋپى بار الكوگول مەن تەمەكى ونىمدەرىنە عانا سالىنۋشى ەدى، ال وزبەكتەر قازاقستاننان ەنگەن بارلىق تاۋارلارعا سونى قوسىپ جانە ونىڭ كولەمىن جىل سايىن ارتتىرۋدا. سونىڭ ىشىندە كونديتەر جانە ەت ونىمدەرىنە، جيھازدار مەن توقىما ونىمدەرىنە 50 پايىز، تەليەۆيزورلارعا 60، ءسۇت ونىمدەرى مەن شىرىندارعا 70 پايىز كولەمىندە اكسيز سالاتىنىن ايتتى. ول ول ما، الكوگولسىز سۋسىندارعا 100، بالمۇزداقتارعا ءتىپتى 200 پايىز كولەمىندە اكسيز سالىپ، باعاسىن 2-3 ەسەگە ارتتىرىپ جىبەرەدى ەكەن. 2013 جىلى وزبەك اعايىندار تاعى دا 45 ءتۇرلى ونىمدەرگە اكسيز قوساتىنىن ايتىپتى. مۇنىڭ ءوزى قازاقستاندىق تاۋارلاردى ەنگىزبەۋدىڭ ءبىر جاقتى امالى ەكەنى ءسوزسىز. بۇل ءىس 1997 جىلى قول قويىلعان ەكى ەل اراسىنداعى كەلىسىمشارتتى تىكەلەي بۇزىپ وتىر، دەدى ن.جازىلبەكوۆ. ال ءبىزدىڭ جاق وزبەك تاۋارلارىنا ەشقانداي ۇستەمە الىم-سالىق قوسپاي، ەسىگىمىزدى شالقاسىنان اشىپ تاستادىق. بۇگىنگى كۇنى قازاقستانعا وزبەكتەر جينايتىن اۆتوموبيلدەر مەن اۋىلشارۋاشىلىعى ماشينەلەرى  جانە باسقا دا تاۋارلار اعىلىپ كەلىپ جاتىر. سايىپ كەلگەندە مۇنداي «جومارتتىق» وزبەكتەرگە جەڭىلدىك جاساپ، ال ءوزىمىزدىڭ تاۋاروندىرۋشىلەردىڭ مۇددەسىن قورعاي الماي وتىر، دەي كەلىپ دەپۋتات ن.جازىلبەكوۆ پرەمەر-مينيستر كارىم ءماسىموۆتىڭ اتىنا وسى ماسەلەلەردى كورسەتىپ ساۋال جولدايتىنىن، وندا ەكىجاقتى تەڭ جاعدايدى جاساۋ ءۇشىن وزبەك جاعىمەن اكسيزدەردى الىپ تاستاۋ جونىندە كەلىسىمگە كەلۋدى بولماسا، ءبىز دە سونداي كولەمدە ولاردىڭ تاۋارلارىنا سالىق سالۋىمىز قاجەت ەكەنىن ۇسىناتىنىن ايتتى.  بۇل دەپۋتاتتىق ساۋالعا پارلامەنتتەگى «اق جول» پارتياسى فراكسياسىنىڭ بارلىق مۇشەلەرى قول قويدى.

 ارمان ادىلەت