پريسيللا مورس ەسىمدى ايەل Facebook الەۋمەتتىك جەلىسىن اقتارىپ وتىرىپ، يەك سۇيەگى عانا قالعان، ابدەن توزىعى جەتكەن 7 جاستاعى بالانىڭ سۋرەتىن كورىپ قالادى. سۋرەتتى كورە سالا ەش ويلانباستان ول بالاقايدى اسىراپ الۋ ءۇشىن جارتى الەمدى كەزىپ جەتكەن ەكەن، دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

بولگاريا ەلىنە قاجەتتى قۇجاتتاردى راسىمدەۋگە كەلگەن كەزىندە رايان ەسىمدى بالاقاي بار-جوعى 3 كەلى عانا سالماقتا بولىپ، ءومىرى قىل ۇستىندە تۇرعان.

تەننەسيدە ءوزىنىڭ جاڭا وتباسىنا كەلگەن بالا ءبىر جىلدا سويلەۋدى ۇيرەنگەن جانە ءبىرشاما سالماق قوسقان ەكەن. قازىرگى كەزدە ونىڭ جاعدايى الدەقايدا جاقسى، ءبىر جىل بۇرىنعى اشارشىلىقتى ۇمىتقان.، مۇلدەم باسقا بالا سەكىلدى وزگەرگەن.

پريسيللانىڭ ايتۋىنشا، ول رايان جايىندا 2014 جىلى ەستىگەن، كەيىننەن Facebook پاراقشاسىن اقتارىپ وتىرىپ اسىراپ الۋعا قاتىستى بالاقايدىڭ جەكە پاراقشاسىن كوزى شالعان.

سول ۋاقىتتا ءوزىنىڭ ديەۆيد ەسىمدى جۇبايىمەن بىرگە ول بالاقايدى اسىراپ الۋعا ناقتى شەشىم قابىلداپتى. بۇل جۇپتىڭ راياننان بولەك ەكى تۋعان بالالارى بار: ءبىرى 13 جاستا، ال ەكىنشىسى 7 جاستا. سونىمەن قاتار 2012 جىلى اسىراپ العان ماككەنزي ەسىمدى 7 جاستاعى قىزدارى بار. ول قىز دا ەرەكشە كۇتىمدى قاجەت ەتەتىن سىرقات بالا، دارىگەرلەر ول قىزعا جۇرەكتەگى اقاۋ مەن داۋنا دەگەن دياگنوز قويعان.

«راياندى ەڭ العاش كورگەن كەزىمدە راسىمەن دە قورقىپ كەتتىم. تەزىرەك اسىراپ الۋعا اسىقتىم. مەن قۇجاتتاردى راسىمدەپ بولامىن دەگەنشە ءولىپ كەتەدى مە دەپ قاتتى قورىقتىم»، - دەپ ەسكە الادى پريسيللا.

اشارشىلىق ناۋبەتىن باسىنان كەشكەن بالاقايدىڭ دەنساۋلىعى دا تىم ناشار ەدى: سكوليوز، كوسولاپيە، دسپ، ميكروسەفاليا دەرتتەرىنە شالدىققان.

بولگاريادان كەلگەن بويدا راياندى دەرەۋ اۋرۋحاناعا جاتقىزعان. «وسى ۋاقىتقا دەيىن دارىگەرلەردىڭ كىشكەنتاي بۇلدىرشىنگە قاراپ جىلاعاندارىن كورمەپپىن. ولار ماعان راياندى كەز كەلگەن ۋاقىتتا ءولىپ قالۋى مۇمكىن ەكەندىگىن قايتا-قايتا ەسكەرتە بەردى»، - دەيدى پريسيللا.

اۋرۋحانادا ءبىر جارىم ايت جاتقاننان كەيىن بالاقاي وڭالا باستاعان. سۋرەتتەردەن ونىڭ قانشالىقتى ءتاۋىر بولعاندىعىن كورۋگە بولادى. قازىرگى تاڭدا رايان شامامەن 10،5 كەلى سالماق تارتادى جانە دە وزدىگىنەن قوزعالىپ، سويلەسە باستادى.

دارىگەرلەردىڭ ايتۋىنشا، بالا تولىق جازىلىپ كەتۋى ءۇشىن كەمىندە ءبىر جىلدان استام ۋاقىت كەرەك. 

اۋدارعان: نازەركە لابيحان