قاراعاندى وبلىسىندا جول-كولىك وقيعاسى كەزىندە ەر ادامنىڭ اۋزىنا تەمىر ارماتۋرا كىرىپ كەتكەن. 2 ماۋسىمدا شامامەن ساعات 21.00-دە قاراعاندى-شاحتينسك تاسجولىندا ارماتۋرا تاسىمالداعان Volkswagen Passat پەن جەڭىل كولىك سوقتىعىسقان. سوڭعى اتالعان كولىكتە 1994 جىلعى جىگىت پەن ونىڭ جۇكتى ايەلى بولعان، - دەپ حابارلايدى قامشى اقپاراتتىق اگەنتتىگى Tengrinews.kz پورتالىنا سىلتەمە جاساپ. 

ورتالىق بايىتۋ فابريكاسىنا قاراي بۇرىلعاندا تىركەمە اۋىپ، قارسى باعىتتاعى جولعا شىعىپ كەتىپ، مەتالل ارماتۋرالار شاشىلعان. تەمىرلەردىڭ ءبىرى Passat كولىگىنىڭ ارتىندا كەلە جاتقان ءاۆتوموبيلدىڭ بەتكى تەرەزەسىن تەسىپ ءوتىپ، جۇرگىزۋشىنىڭ اۋىز قۋىسىنا كىرىپ كەتكەن.

ەر ادام شاحتينسك قالالىق ورتالىق اۋراحاناسىنا سول كۇيى جەتكىزىلگەن. جۇكتى ايەلى، ابىروي بولعاندا، زارداپ شەكپەدى. ال جۇرگىزۋشىنىڭ تىستەرى سىنعان، بەت سۇيەگى جارالانعان. باقىتىنا وراي، تەمىر ونىڭ ميىنا قاراي ەمەس، تومەنگە كەتكەن. جاردەم كورسەتىلگەننەن كەيىن ەر ادام قاراعاندىداعى اۋرۋحاناعا جەتكىزىلدى. وندا ارماتۋرانى شىعارۋ بويىنشا وتا جاسالعان. بۇگىندە ەر ادامنىڭ جاعدايى قاناعاتتانارلىق، 4 ماۋسىمدا ول قاراعاندىداعى بەت-جاقسۇيەك اۋرۋحاناسىنا اۋىستىرىلىپتى.

"ال Passat جۇرگىزۋشىسى تىركەمەسىنە ارماتۋرانى جاقسىلاپ بەكىتكەنىن ايتىپ وتىر. تىركەمەنىڭ نە سەبەپتى اۋدارىلعانى، وندا سالماعى قانشا جۇك بولعانى جانە جۇكتىڭ قالاي بەكىتىلگەنىن انىقتاۋ بويىنشا تەرگەۋ ءجۇرىپ جاتىر"، - دەپ حابارلادى اباي قالالىق ءىىب جپق وكىلدەرى.

ەسكەرتە كەتەيىك، ۆيدەودا بەيادەپ سوزدەر بار!