اليمەنت تولەمەسەڭىز اباقتىعا قامالۋىڭىز مۇمكىن. قىزىلوردالىق سوت ورىنداۋشىلار بورىشكەرلەرمەن كۇرەستى كۇشەيتىپ وتىر. سان سىلتاۋ ايتىپ، بالاسىنا اليمەنت تولەمەي جۇرگەندەردەن ءماجبۇرلى تۇردە ءوندىرىپ الۋ ماقساتىنداعى رەيد جيىلەدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ.  

كەزەكتى ىزدەستىرۋ شاراسىندا زاڭ قىزمەتكەرلەرى ءتيىستى تولەمنەن باس تارتقان قالا تۇرعىنىنىڭ ۇيىنە بارىپ، تەلەديدار مەن سۋ تازارتقىش قۇرىلعىسىن تاركىلەدى. تۇراقتى مەكەنجايىن جاسىرىپ، قاشىپ-پىسىپ جۇرگەن ازاماتتاردى تابۋعا كوشى-قون پوليسيا قىزمەتكەرلەرى دە اتسالىسىپ جاتىر. قازىرگى تاڭدا ادىلەت ورگاندارى ماماندارىنىڭ وندىرىسىندە 5 مىڭعا جۋىق ءىس قارالۋ ۇستىندە.

باستى ماقسات – بورىشكەردىڭ دۇنيە-مۇلكىن تارتىپ الۋ ەمەس، ءتىرى جەتىم قالعان شاراسىز بالالاردىڭ زاڭدى قۇقىقتارىن قورعاۋ. ەگەر بالا الدىنداعى بەرەشەك 3 ايدان اسسا، اكىمشىلىك شارا قولدانىلادى. زاڭ تالاپتارىنا باعىنباعاندار قىلمىستىق جازاعا تارتىلۋى مۇمكىن.

ءاليا ايبوسىنوۆا، قالالىق اليمەنت تولەمدەرىن ءوندىرۋ بويىنشا اۋماقتىق فيليال باسشىسى: -جىل باسىنان باستاپ 120 ۇسىنىس ەنگىزىلدى. ولار ءقازىر قارالىپ جاتىر. ونىڭ ىشىندە 17 بورىشكەرگە قاتىستى قىلمىستىق ءىس قوزعالدى. سونىمەن قاتار بورىشكەرلەرگە قاتىستى ءتيىستى اليمەنتىن تولەمەگەن جاعدايدا جۇرگىزۋشىلىك كۋالىگىنەن ايىرۋ جونىندە دە سوتقا ۇسىنىستار ەنگىزىلۋدە.

شولۋشى : ايگەرىم تاۋباي