سەمەي تۇرعىنى وزبەك تۇرمەسىندە قاماۋدا جاتىر، دەپ حابارلايدى قامشى اقپاراتتىق اگەنتتىگى كتك ارناسىنىڭ مالىمەتىنە سۇيەنىپ.  وتانداسىمىز ۆيتاليي نەنچەنكو كورشى ەلدەگى تۋىستارىنا بارماق بولعان كورىنەدى. الايدا ونىڭ ۇيالى تەلەفونىنىڭ ىشىندەگى بەينەروليك وزبەك پوليسياسىنىڭ كۇدىگىن تۋدىرعان. ال زار قاقان جاقىندارى ونىڭ ءتىپتى قانداي روليك بولعانىن بىلە الماي دال. تەك، ۆيتاليي نەنچەنكونىڭ 10 جىلعا دەيىن باس بوستاندىعىنان ايىرىلۋى مۇمكىن ەكەنىن، سونداعى قورعاۋشىلارىنان ءبىلىپتى.

ۆيتاليي نەنچەنكو دەمالىسىندا وتباسىمەن بىرگە تاشكەنت- سامارقاند- بۇقارادا تۇراتىن تۋىستارىن ارالاماق بولعان. الايدا، شەكارادان وتە سالا وزبەك قۇزىرلى ورىندارىنىڭ كوزىنە ءتۇسىپتى. ۇيالى تەلەفونىن تەكسەرگەن «كەلەس» ستانسياسىنداعى پوليسەيلەر سول جەردە جىبەرگەنىمەن، كەيىن قولىنا كىسەن سالعان. وعان سەبەپ، WhatsApp مەسەندجەرى ارقىلى كەلگەن ەكى بەينەروليك كورىنەدى. ال، جارىنىڭ ايتۋىنشا، ءوزى مۇنى كورمەك تۇگەلى، جۇكتەپ تە ۇلگەرمەگەن.

تاميلا بەكشەنيەۆا، ۆيتاليي نەنچەنكونىڭ جۇبايى:

ء-بىز 5 كۇن ەمىن-ەركىن جۇردىك. ۆيتالييگە تۇسىنىكتەمە جازدىرىپ جىبەرگەن بولاتىن. ءسويتىپ، سامارقاند پەن بۇقارانى تۇگەل ارالادىق. ەگەر كىناسى بولسا، قاشىپ كەتۋىمىزگە بولاتىن ەدى عوي. ءبىراز كۇننەن سوڭ جولداسىمدى شاقىردى. پروكۋرورمەن سويلەسسە كەرەك، 28ء-شى مامىر كۇنى بىردەن ماعان قوڭىراۋ شالىپ، قورعاۋشى تاۋىپ كەلۋىمدى سۇرادى.

وتانداسىمىزدىڭ وسىنداي ايىپپەن كورشى ەلدە قاماۋدا جاتقانىنا ەكى اپتاعا جۋىق ۋاقىت بولدى. ال، ونىڭ اماندىعىن بىلە الماعان جاقىندارى نە ىستەرىن بىلمەي دال. تەك، ۆيتالييگە قاتىستى قىلمىستىق ءىس قوزعالعانى تۋرالى سونداعى قورعاۋشىلارىنان ەستىپتى.

يۋليا مەدۆەديەۆا، ۆيتاليي نەنچەنكونىڭ قارىنداسى:

-وندا ەشقانداي ەكسترەميستىك باعىت جوق. ءوزى دىنگە دە سونداي بەرىلمەيتىن. ءتىپتى، 37 جاسىنا دەيىن قىلمىستىق تۇرماق، اكىمشىلىك جاۋاپكەرشىلىككە دە تارتىلماعان بولاتىن.

ەلىمىزدىڭ سىرتقى ىستەر مينيسترلىگى، بۇل ءىستى وزبەكستانداعى ەلشىلىك باقىلاۋعا العانىن جەتكىزدى. الايدا، ءۆيتالييدىڭ جاعدايى ازىرگە بەلگىسىز كورىنەدى.

ەستەرىڭىزگە سالساق، 5 جىل بۇرىن تاعى ءبىر وتانداسىمىز وزبەك تۇرمەسىنە قامالعان بولاتىن. ونىڭ دا قولىنداعى نەتبۋگىنان كۇدىكتى ۆيدەو تابىلىپ، ەكسترەميستىك ۋاعىز جۇرگىزدى دەگەن ايىپپەن اقىرى 5 جىلعا سوتتالدى. ۆيتاليي نەنچەنكونىڭ جاقىندارى دا ەندى وسىلاي 10 جىلعا دەيىن سوتتالىپ كەتەدى دەپ ۇرەيلەنىپ وتىر.

شولۋشى: ايگەرىم تاۋباي