32 جاستاعى بريتاندىق ايەل بالا كەزىندە ءوزىنىڭ تۋىس اعاسىنىڭ تاراپىنان زورلىق كورگەن. سول ءىسى ءۇشىن تۇرمەگە قامالعان اعاسى مەرزىمىنەن بۇرىن بوساتىلدى، ال ارنايى ورگاندار ايەلگە بۇل جايىندا حابارلاماعان. تۇرمەگە قامالماي تۇرىپ اعاسى اياق استى لوتەرەيادان ۇتىس ۇتىپ، باي بولىپ شىعا كەلگەن ەدى. ال كوڭىلىندە جاراسى قالىپ قويعان ايەل بولسا قالاي دا كەگىن قايتارماقشى بولىپ، اعاسىنىڭ ءۇيىن ورتەيدى.

اقىرى بۇل ءىسى ءساتتى اياقتالماي، ايەلگە قىلمىستىق ءىس قوزعالادى.

ۋەلس كومپانياسىن باسقاراتىن دجۋلي بارنەتت ەسىمدى كاسىپكەر ايەل 8 جاسىندا تۋىس اعاسى ديەۆيل دياستىڭ تاراپىنان كورگەن قاسىرەتىن بۇگىنگى كۇنگە دەيىن ىشىندە ءتۇيىپ كەلگەنىن ايتادى. كۇيەۋى جانە ەكى بالاسىمەن باقىتتى وتباسىلىق عۇمىر كەشكەنىمەن وتكەنى ونىڭ بويىنا تۇساۋداي بايلانىپ العان. سول كەزدەگى قاسىرەتى ءالى كۇنگە دەيىن كوز الدىندا.

ءوز جيەنى مەن وزگە دە وقۋشى قىزداردى قورلاعان پەدوفيل 15 جىلعا تۇرمەگە قامالادى. بۇدان توعىز جىل بۇرىن دياس لوتەرەيادان 8 ملن. فۋنت ۇتىپ، بايىپ العان ەدى. اسقان بايلىعىنىڭ ارقاسىندا تۇرمەدەن 5 جىلعا ەرتە شىعادى.

دياس تۇرمەدەن شىققانىمەن باقىلاۋ قىزمەتى بارنەتتكە زاڭ بويىشا حابارلاۋى ءتيىس ەدى، الايدا ايەل بۇل جايىندا كەش ءبىلدى. ءوز وتباسىن قورعاۋ ماقساتىندا زورلىقشىنى دا قيناماقشى بولادى. ءسويتىپ اعاسىنىڭ ءۇيىن ورتەۋگە بەل بايلايدى. ول ۋاقىتتا ءۇيدىڭ ىشىندە ەشكىم بولمعان، ءورت تە عيماراتتى تۇگەلدەي جايلاپ ۇلگەرمەدى.

پەدوفيلدىڭ قۇربانى بولعان ايەلگە قىلمىستىق ءىس قوزعالدى. ءبىراق فەميدا قىزمەتكەرلەرى ءدجۋليدىڭ بالا كەزدەگى اعاسى تاراپىنان كورگەن قاسىرەتىن ەسكەرىپ، تۇرمەدەگى مەرزىمىن 1 جىل ەتىپ تاعايىندايدى. بارنەتت ىستەگەن ىسىنە وكىنەتىنىن ايتتى، سونداي-اق جۇمىسىن دۇرىس اتقارماعان زارداپ شەگۋشى ادامداردى قورعاۋ ماسەلەلەرىمەن اينالىساتىن ارنايى قىزمەتكەرلەردى دە ايىپتادى.

شولۋشى: گۇلىم جاقان