رەسەي فەدەراسياسى قازاقستانعا اتىراۋ وبلىسى «تايسويعان» اسكەري پوليگونىنداعى 624 مىڭ گەكتار جەردى قايتارۋدا، دەپ جازادى Qamshy.kz اگەنتتىگى.
«رەسەيلىك اسكەريلەرگە اتىراۋ وبلىسى قىزىلقوعا اۋدانىنداعى پوليگون اۋماعىندا 749،6 مىڭ گەكتار جەر جالعا بەرىلگەن ەدى. قازىرگى تاڭدا ەكى ەل اراسىندا جاسالعان كەلىسىم بويىنشا 624 مىڭ گەكتار جەردى قايتارۋ پروسەسى جۇرگىزىلىپ جاتىر»، - دەپ حابارلادى وبلىستىق جەر قاتىناستارى باسقارماسىنىڭ باسشىسى ارمان باجەنوۆ وڭىرلىك كوممۋنيكاسيالار قىزمەتىنىڭ بريفينگىندە.
رەسەيلىك اسكەريلەر بۇرىن پوليگون اۋماعى بولعان «تايسويعاندى» جالعا السا دا، ونى پايدالانعان جوق. سوندىقتان، بۇل جەرلەردى شارۋالارعا بەرۋگە ەشقانداي كەدەرگى جوق.
اتىراۋ وبلىسىنىڭ قىزىلقوعا اۋدانىنداعى 750 مىڭ گەكتارعا جۋىق جەر 1949 جىلدان بەرى اسكەري پوليگونعا تيەسىلى بولعان. 1966-77 جىلدارى بۇل ايماقتا جيىرمادان استام يادرولىق سىناق وتكىزىلدى. ودان كەيىنگى ۋاقىتتا بۇل جەر پايدالانۋسىز جاتقانىمەن، جەرگىلىكتى شارۋالار يگىلىگىن كورە العان جوق. ويتكەنى، بۇل جەردى 1991 جىلى ەلىمىز تاۋەلسىزدىك العاننان كەيىن رەسەي جالعا الدى. ءقازىر پوليگون اۋماعىندا 1،5 مىڭنان استام ادام تۇرادى. بۇعان دەيىن رەسەي جالعا العاندىقتان اۋدانعا قاراستى ۇلان-عايىر اۋماقتى يگەرۋ ءۇشىن زاڭدى قۇجات راسىمدەۋ مۇمكىن بولمادى.
جىل باسىندا رەسەيدىڭ قورعانىس ءمينيسترى سەرگەي شويگۋ قازاقستانداعى ەمبى پوليگونىن جالعا الۋ جانە پايدالانۋ بويىنشا كەلىسىمدى توقتاتۋ تۋرالى قازاقستاندىق-رەسەيلىك مەملەكەتارالىق حاتتاماعا قول قويدى. وعان ساي قازاقستاننان جالعا العان 300 مىڭ گەكتارعا جۋىق جەر قايتارىلعان ەدى.
ەسكە سالساق، رەسەيگە جالعا بەرىلگەن قازاق جەرلەرىن قايتارۋ تۋرالى حالىق اراسىندا وقتىن-وقتىن ءسوز بولادى. قوعامدىق پىكىر جەردى جالعا بەرۋ تاۋەلسىزدىككە ءقاۋىپتى دەپ سانايدى. تەرىسكەيدى كورشى قازاقستاننان 7 بىردەي پوليگوندى جالعا العان. ولاردىڭ ءىرىسى بايقوڭىر عارىش ايلاعى. رەسەي قازاقستانعا تيەسىلى بايقوڭىردى 1994 جىلدان باستاپ جالداپ، جىلىنا 115 ميلليون دوللار تولەپ، 2050 جىلعا دەيىن تولىق پايدالانۋعا رۇقسات العان.
