كوكشەتاۋ كوللەدجىندە ستۋدەنتتەردەن اقشا جيناۋعا قاتىستى داۋ شىقتى، - دەپ حابارلايدى، قامشى اقپاراتتىق اگەنتتىگى tengrinews.kz-كە سىلتەمە جاساپ. 

قالا كوللەدجدەرىنىڭ بىرىندە بيۋدجەت قاراجاتىنا ءبىلىم الىپ جاتقان ستۋدەنتتەر اي سايىن 10 مىڭ تەڭگە تولەگەن بولىپ شىقتى. بۇل جاعدايدى اقمولا وبلىسىنىڭ ءبىلىم باسقارماسىنىڭ وكىلدەرى انىقتاعان. وسىعان بايلانىستى وقۋ ورنىندا تەكسەرىس وتكىزىلەدى. 

"بۇل كوللەدجبەن بىزدە تەحنيكالىق ماماندىقتار بويىنشا بيۋدجەتتىك ورىنداردى ورنالاستىرۋ تۋرالى كەلىسىمشارت بار. بيۋدجەت قارجىسىنا وقىپ جاتقان ستۋدەنتتەر تەگىن ءبىلىم الۋعا قۇقىلى، ەشقانداي قوسىمشا قارجى تولەۋگە مىندەتتى ەمەس. بۇدان باسقا امالدار زاڭدى بۇزۋ بولىپ سانالادى"، - دەيدى ءبىلىم باسقارماسى باسشىسىنىڭ ورىنباسارى ۆالەريي گامازوۆ.

الايدا كوللەدج باسشىلىعى اي سايىنعى تولەمدەر دەمەۋشىلىك ماقساتتا بولعاندىقتان، اقشا جيناۋدىڭ زاڭدى ەكەنىن ايتادى. 

"بيۋدجەتتەن قارجى وقىتۋشىلاردىڭ ەڭبەكاقىسىنا عانا بولىنەدى. ال كوممۋنالدىق قىزمەتكە اقشانى قايدان الامىز؟ ماتەريالدىق-تەحنيكالىق قۇرىلعىلارعا؟ وقۋلىقتارعا؟ ءبىلىم باسقارماسىنان بۇل مەملەكەتتىك تاپسىرىستى الماس بۇرىن اتا-انالاردى جيناپ، ايىنا 10 مىڭ تەڭگە بەرىپ تۇرۋعا كەلىسە مە دەپ سۇرادىق. ولار كەلىستى. كەلىسىمشارت جاساستىق"، - دەيدى كوللەدج ديرەكتورى كۇنسۇلۋ حۋساينوۆا. 

سونىمەن بىرگە، كوللەدج ديرەكتورى اتا-انالاردىڭ ءبىرى قارسى بولسا، ستۋدەنت اقىلى بولىمگە اۋىستىرىلاتىنىن تۇسىندىرە كەتتى. 

ال ۆالەريي گامازوۆ مەملەكەتتىك تاپسىرىس سوماسىنا پەداگوگتاردىڭ ەڭبەكاقىسى، كوممۋنالدىق قىزمەت اقىسى جانە وزگە دە شىعىندار كىرەتىنىن ايتادى. بۇل قاراجاتتا قاراستىرىلماعان جالعىز شىعىن - كۇردەلى شىعىندار، نەگىزگى قۇرىلعىلىردى ساتىپ الۋعا، عيماراتتى كۇردەلى جوندەۋدەن وتكىزۋگە جانە تاعى باسقالارىنا جۇمسالادى ەكەن. 

تاياۋ ۋاقىتتا ءبىلىم باسقارماسى كوللەدج باسشىلىعىنىڭ ارەكەتى قانشالىقتى زاڭدى ەكەنىنە تەكسەرىس جۇرگىزەدى. تەكسەرىس قورىتىندىسى بويىنشا قاجەتتى شارالار قولدانىلادى. 

"ەگەر اتا-انالار ارىزدانسا، كوللەدج كاسساسىنا تولەنگەن قاراجاتتىڭ بارلىعىن قايتارۋى كەرەك بولادى. ەگەر شاعىم بولماسا، قارجى كوللەدجدە قالادى جانە بۇل قايىرىمدىلىق رەتىندە قابىلدانادى. ءبىراق مۇنى توقتاتاتىنىمىز جانە الدا بولدىرمايتىنىز انىق"، - دەيدى ءبىلىم باسقارماسىنىڭ وكىلى. 

سونىمەن قاتار، وبلىس وراتالىعىنداعى مەملەكەتتىك تاپسىرىس العان جەكەمەنشىك كوللەدجدەرگە دە تەكسەرىس جۇرگىزىلەدى.