الماتى اكىمى باۋىرجان بايبەك دومينيكان رەسپۋبليكاسىنىڭ سىرتقى ىستەر ءمينيسترى ميگەل وكتاۆيو ۆارگاس مالدونادومەن كەزدەستى. تاراپتار مادەنيەت، تۋريزم، ينۆەستيسيا سالالارى بويىنشا ىنتىماقتاستىقتى ارتتىرۋ ماسەلەلەرىن تالقىلادى، دەپ حابارلايدى قامشى اقپاراتتىق اگەنتتىگى قالا اكىمدىگىنىڭ سايتىنا سىلتەمە جاساپ.

كەزدەسۋ بارىسىندا دومينيكان رەسپۋبليكاسى ءسىم باسشىسىنىڭ قازاقستانعا العاشقى ساپارى ەكى ەل اراسىنداعى ءوزارا بايلانىستى دامىتۋعا ىقپال ەتەتىنى ايتىلدى. م.ۆارگاس استاناداعى «ەكسپو-2017» حالىقرالىق كورمەسىنىڭ جوعارى دەڭگەيدە وتەتىنىن، وعان دومينيكان رەسپۋبليكاسىنىڭ دا قاتىساتىنىن ءسوز ەتتى.

«الماتى قارجىلىق ءوڭىر ورتالىعى، جەكە كاپيتال جانە ساۋدا قالاسى رەتىندە تانىمال، ءبىزدىڭ دەلەگاسيا قۇرامىندا بانكيرلەر، وندىرىسشىلەر بار، ناقتىلى ينۆەستيسيالىق جوبالار تۋرالى تالقىلاۋعا مۇمكىندىك جەتكىلىكتى»، - دەدى ول.

دومينيكان رەسپۋبليكاسى ءسىم-نىڭ باسشىسى الماتى اكىمىن ءوز ەلىنە رەسمي ساپارمەن كەلۋگە شاقىردى، بولاشاقتا سانتو-دومينگو مەن الماتىنىڭ باۋىرلاس قالالارعا اينالاتىندىعىنا جانە ەكى قالا اراسىندا مادەني بايلانىستىڭ مىقتاپ ورنىعاتىنىنا سەنىم ءبىلدىردى، «سمارت سيتي» باعدارلاماسى اياسىندا تاجىربيە الماسۋعا بولاتىندىعىن ايتتى.

كەزدەسۋ بارىسىندا شەتەلدىك دەلەگاسياعا الاتاۋ اۋدانىنداعى يندۋستريالدى ايماقتىڭ، «يننوۆاسيالىق تەحنولوگيالار پاركى» اەا مەن ينۆەستورلارعا ءبىر تەرەزە قاعيداسى بويىنشا قىزمەت كورسەتەتىن ورتالىقتىڭ الەۋەتى كورسەتىلدى.

شولۋشى: گۇلىم جاقان