قازاقستان-قىتاي كينوفەستيۆالى اياسىندا جۋرناليستەردىڭ سۇراقتارىنا جاۋاپ بەرگەن اكتەر قازاقستاندا قايىرىمدىلىقپەن اينالىسقىسى كەلەتىنىن ايتتى دەپ حابارلايدى Qamshy.kz
«راسىندا مەن وسى سالادا جۇمىس ىستەۋگە ءاردايىم دايىنمىن. ب ا ق وكىلدەرى اراسىنداعى دوستارىمنان مەنىڭ كومەگىم قاجەت بولۋى مۇمكىن پروبلەمالار جايلى كوبىرەك ايتۋىن سۇرايمىن. سەبەبى مەن قازاقستاندى جاقسى بىلمەيمىن جانە ونداعى ادامدارعا نە قاجەت ەكەنىن دە بىلمەيمىن. ادەتتە مەن قايىرىمدىلىقپەن اينالىسقاندا ب ا ق وكىلدەرى ماعان مەنىڭ قانداي كومەگىم ءتيۋى مۇمكىن ەكەنىن ايتادى»، - دەگەن دجەكي چان.
اتى اڭىزعا اينالعان اكتەر دجەكي چان كەشە قازاقستانعا ۇشىپ كەلگەنىن جازعان ەدىك. دجەكي چاندى استانا اكىمى يسەكەشيەۆ پەن قازاقستان رترك باسشىسى ەرلان قارين كۇتىپ العان.
جۇڭگو كينوسى فەستيۆالىنىڭ اشىلۋ سالتاناتىنا دجەكي چان قوناقكادە رەتىندە جۇڭگو تىلىندە «وتان» ءانىن شىرقادى. اكتەر بۇل ءان وتانشىلدىققا باۋليتىنىن، سونداي-اق، بارلىق ادام ءوز وتانىن ءسۇيۋ كەرەك ەكەندىگىن جەتكىزدى. ايتا كەتەيىك، دجەكي چاننىڭ ءان شاشۋىنان كەيىن قازاقستاندىق ءانشى ديماش قۇدايبەرگەن ساحناعا شىعىپ، «Singer» بايقاۋىندا شىرقاعان قىتايشا «كۇزگى مۇڭ» ءانىن ايتىپ بەردى.
قىتايلىق ءارى امەريكالىق اكتەر دجەكي چان ديماش تۋرالى دا ايتقان. ديماشتىڭ ايگىلى كينواكتەر بولاتىنى تۋرالى ايتقان ول «ديماش بۇكىل قىتايلىقتاردى جانە مەنى ونەرىمەن ءتانتى ەتتى» دەپ ديماشقا دەگەن قۇرمەتىن ءبىلدىردى.
ول بۇگىن جۇڭگو كينوسى فەستيۆالىنىڭ اشىلۋ سالتاناتىنا قاتىسار الدىندا «قازاقستان» ۇلتتىق تەلەارناسىنىڭ «تۇنگى ستۋديا» باعدارلاماسىنا سۇحبات بەردى.
سونىمەن قاتار ايگىلى اكتەر قازاقستاندىقتاردى ءوزىنىڭ بەيجىڭدە اشىلعان كۋنگ-فۋ مەكتەبىندە ءدارىس الۋعا شاقىردى. ءقازىر بەيجىڭدە كۋنگ-فۋ بويىنشا جاتتىعۋلار جۇرگىزۋدەمىز، الداعى جىلى وندا مەكتەبىمىزدى رەسمي تۇردە اشۋعا نيەتتىمىز. سوندىقتان دا وسى مۇمكىندىكتى پايدالانا وتىرىپ، وسى ونەرگە قىزىعۋشىلىق تانىتقان ادامدار بەيجىڭگە كەلىپ، كۋنگ-فۋدى مەڭگەرۋدى وتىنەر ەدىم. بۇگىندە وسى سالاداعى جۇمىستارىمىز جاڭادان قارقىن الۋدا، وسى ورايدا بولاشاقتا بارشا الەمدە مەكتەپتەردى اشۋعا نيەتتىمىن. مۇمكىن قازاقستاندا دا كۋنگ-فۋ مەكتەبى اشىلىپ قالار»، - دەدى تانىمال اكتەر.
سونداي-اق، دجەكي چان قازاقستانعا كەلىپ، وسىندا كينەماتوگرافيامەن اينالىسۋدى ارمانداعانىن دا ايتتى.
«10 جىل بۇرىن قازاقستاننىڭ گونكونگتاعى ەلشىسى قازاقستاننىڭ باي رەسۋرستارى جايلى ايتىپ بەرگەن بولاتىن. بەس جىل بۇرىن ەلشى ماعان تاعى دا قازاقستان جايلى ايتىپ بەردى. شىنىمدى ايتسام، قازاقستانعا كەلىپ، وسىندا كينەماتوگرافيامەن اينالىسۋدى ارماندايتىنمىن. ءبىراق، امال نە، ۋاقىتتىڭ تىعىز بولۋىنا بايلانىستى بۇل ارمانىم سول كۇيى ورىندالماعان ەدى. ءبىراق مەن بولاشاقتا مىندەتتى تۇردە قازاقستانعا كەلىپ، وسى ىسپەن اينالىسقىم كەلەدى»، - دەدى اكتەر استانادا ءوتىپ جاتقان قازاقستان-قىتاي كينوفەستيۆالىندە.
سونداي-اق، دجەكي چان قازاقستان تابيعاتىنىڭ وعان اسەر قالدىرعانى سونشالىق - ول ءوزىنىڭ بويەۆيك جانرىنداعى فيلمدەرىنە ەكشن قويىلىمدار ءتۇسىرىپ، ءبۇلدىرىپ الامىن با دەپ قورقاتىنىن ايتتى.
ايتا كەتەيىك، 2017 جىلدىڭ 7-18 ماۋسىم ارالىعىندا استانادا قازاقستان-قىتاي كينوفەستيۆالى وتەدى. الەمدىك اكتەر، كاسكادور، كينورەجيسسور، كينوپروديۋسەر، سەناريست، ءانشى، ميلليونداعان كورەرمەننىڭ سۇيىكتىسىنە اينالعان اڭىز ادام - 63 جاستاعى دجەكي چان قازاقستانعا وسى شاراعا قاتىسۋ ءۇشىن كەلىپ وتىر. ەلوردالىقتار مەن قالا قوناقتارى فەستيۆال اياسىندا «ىلە وزەنى»، «شىنايى ماحاببات»، «گۇلىم»، «قاتەرلى ىسىك مىرزا، كەتىڭىز»، «قاسقىر توتەمى» سىندى تۋىندىلاردى تاماشالاي الادى.
