ۇندەۋ

ءبىز مەملەكەتىمىزدىڭ مەرەيىن ۇستەم ەتەتىن، مارتەبەسىن ارتتىرىپ، ابىرويىن اسقاقتاتا تۇسەتىن الەمدىك دەڭگەيدەگى تاريحي ءىس-شارانىڭ قارساڭىندا تۇرمىز.

بارشاڭىزعا بەلگىلى، ەلىمىزدە 10 ماۋسىمدا EXPO-2017 حالىقارالىق كورمەسى باستالادى. وسىعان دەيىن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءسامميتىن، استانا ەكونوميكالىق فورۋمىن، ينۆەستيسيالىق فورۋم، دۇنيەجۇزىلىك يسلام ەكونوميكالىق فورۋمىن، تاعى باسقا حالىقارالىق دارەجەدەگى شارالاردى جوعارى دەڭگەيدە ۇيىمداستىرعان مەملەكەتىمىز EXPO-2017 كورمەسىن دە ابىرويمەن وتكىزەدى دەگەن سەنىمدەمىز.

الەمنىڭ بارلىق مەملەكەتتەرىنەن ميلليوننان اسا ادامدى جينايتىن وسى اۋقىمدى جوبا ءبىزدىڭ مەملەكەتىمىزدىڭ ەكونوميكاسىنا جاڭا سەرپىن بەرەدى. سوندىقتان، وسى ءىس-شارانى وتكىزۋگە قولعابىس كورسەتۋ، ءبىزدىڭ ەل الدىنداعى ازاماتتىق بورىشىمىز بولىپ تابىلادى.

ويتكەنى، ءبىر جارىم عاسىردان استام تاريحى بار EXPO-2017 حالىقارالىق كورمەسىن جوعارى دەڭگەيدە ۇيىمداستىرۋ ءتۇرلى سالادا جۇمىس ىستەيتىن ادامدارعا ۇلكەن جاۋاپكەرشىلىك جۇكتەيدى.

ەلىمىزدىڭ تاريحىندا التىن ارىپتەرمەن جازىلاتىن ايتۋلى ءىس-شارا – حالقىمىزدىڭ ءدىنى مەن ءداستۇرىن، ادەبيەتى مەن مادەنيەتىن، رۋحانياتى مەن تاريحىن تانىستىرۋدىڭ، ۇلتتىق قۇندىلىقتارىمىزدى كورسەتۋدىڭ، قازاق ەلىنىڭ جەتكەن جەتىستىگىن الەمگە پاش ەتۋدىڭ مول مۇمكىندىگى.

وسى ورايدا، قازاقستان مۇسىلماندارى ءدىني باسقارماسى بارشا وتانداستىرىمىزدى شەتەلدەن كەلگەن قوناقتارعا جىلى شىراي تانىتۋعا، ولارمەن جاقسى مامىلە ورناتۋعا، قىزمەت ساپاسىن ارتتىرۋعا، سان عاسىرلىق تاريحى بار حالقىمىزدىڭ ۇلتتىق رۋحاني مۇراسى مەن ادەت-عۇرپىن، سونداي-اق باستى بايلىعىمىز سانالعان ەلىمىزدەگى ءدىنارالىق كەلىسىم مەن ۇلتارالىق بىرلىگىمىزدى كورسەتۋ بولىپ تابىلادى.

پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءوزىنىڭ حاديس-شاريفىندە: «ءبىر ەلدىڭ باسشىسى (وكىلى) كەلسە وعان لايىقتى قۇرمەت كورسەتىڭدەر»، – دەگەن. قوناقجايلىلىق – قازاقى قاسيەت. قازاقتىڭ قوناقجايلىلىق، دارحاندىق، جومارتتىق قاسيەتى –  بۇرىنعى كوشپەلى اتا-بابالاردان ۇزىلمەي كەلە جاتقان ءداستۇر.   

اللا تاعالا ەل يگىلىگى جولىنداعى باستامالارىمىزدى، جاقسىلىققا جۇمىلدىرىپ، يماندىلىققا ۇيىتاتىن ىزگى ءىس-شارالارىمىزدى بەرەكەلى ەتكەي! جاراتۋشى يەمىز تاۋەلسىزدىگىمىزدى باياندى، ەگەمەن ەلىمىزدىڭ بولاشاعىن جارقىن، حالقىمىزدىڭ بىرلىگىن بەكەم ەتكەي. ءامين!