قىرعىزستان استاناسى بىشكەكتە شانحاي ىنتىماقتاستىق ۇيىمى ەلدەرى ۇكىمەت باسشىلارىنىڭ كەزدەسۋى ءوتتى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ.  باسقوسۋدا ءبىرقاتار قۇجاتقا قول قويىلىپ، الداعى جىلدارداعى ۇيىمنىڭ دامۋىنا قاتىستى ءىس-شارالار ايقىندالدى. ال ساراپشىلار: «قىرعىزستان ءتوراعالىق ەتكەن ءبىر جىل ىشىندە مول تاجىريبە جيناپ، مۇشە ەلدەرمەن ءتيىمدى قارىم-قاتىناسىن نىعايتۋعا مۇمكىندىك الدى»، – دەيدى.

بىشكەكتە وتكەن شانحاي ىنتىماقتاستىق ۇيىمى ۇكىمەت باسشىلارىنىڭ كەزدەسۋىندە ساۋدا-ەكونوميكالىق جانە ينۆەستيسيالىق قاتىناستى دامىتۋعا باعىتتالعان 12 قۇجاتقا قول قويىلدى. ولاردىڭ ءبىرقاتارى جاڭادان قابىلداندى. ونىڭ ىشىندە الداعى 5 جىلدا جۇزەگە اسىرىلاتىن ءىس-شارالار ءتىزىمى بار. بۇل قۇجاتتى ۇيىم اۋماعىنداعى ەكونوميكالىق دامۋعا ارنالعان جول كارتاسى دەسە دە بولادى. ال جولداردى دامىتۋ جونىندەگى كەلىسىمشارت كولىكتىك ينفراقۇرىلىمدى دامىتۋ مەن كولىك جانە لوگيستيكا سالاسىنداعى ءوزارا ءتيىمدى جوبالاردى جۇزەگە اسىرۋدى كوزدەيدى. 

ەديل وسمونبەتوۆ، ساياساتتانۋشى: - قىرعىزستاننىڭ شىۇ-داعى ءتوراعالىعى – بىزگە مول تاجىريبە. دەلەگاتتاردىڭ كەزدەسۋى مەن باسقا دا شارالاردان ءبىز كوپ تاجىريبە جينادىق. ەكىنشىدەن، بىزدە تەڭىزگە شىعاتىن جول جوق. سوندىقتان ەگەر ۇيىمنىڭ ماقساتى مەن بارلىق جۇيەسى جۇمىس ىستەپ جاتسا، الەمدىك نارىققا شىعۋعا قول جەتكىزەمىز. بۇل قىرعىزستان ءۇشىن ءتيىمدى. شانحاي ىنتىماقتاستىق ۇيىمى گەوساياسي جاعدايلارعا بايىپپەن قاراپ، وزگەرىستەردى ۇتىمدى پايدالانۋ ارقىلى ۇنەمى دامىپ كەلەدى. ءقازىر بەدەلدى بىرلەستىككە ايماقتىق قانا ەمەس، الەمدىك تۇرعىدان العاندا ىقپالى كۇشتى ەلدەر كوڭىل اۋدارىپ وتىرعانىن ايتۋعا بولادى. كەزىندە 5 ەلدى بىرىكتىرگەن ۇيىم 8 مەملەكەتتى قامتيتىن بىرلەستىككە اينالدى. سونىمەن قاتار يران – باقىلاۋشى، ال تۇركيا جانە ازەربايجان ەلدەرى ديالوگ بويىنشا ارىپتەس مارتەبەسىنە يە. سوندىقتان ولارمەن قارىم-قاتىناس تىعىز ىنتىماقتاستىقتى قاجەت ەتەدى.

مەدەت تولەگەنوۆ، ساياساتتانۋشى: - بۇل ۇيىمعا مۇشە بولۋعا يادرولىق باسىمدىققا يە ەلدەر دە قىزىعىپ وتىرعان بولار. بۇل – ءتوراعالىق ەتۋشى ەلگە ۇلكەن مۇمكىندىك. مۇندا ءىرى ويىنشىلار بولعانىمەن، ءبىز ءبارىبىر ءوز تاراپىمىزدان تەپە-تەڭدىكتى ساقتاۋ مەن قۇرىلىمداۋدا ۇلەسىمىزدى قوسىپ وتىرمىز. شانحاي ىنتىماقتاستىق ۇيىمىنا قىرعىزستان بىرنەشە رەت ءتوراعالىق ەتتى. ەگەر ۇيىمنىڭ قارقىندى دامۋىن ەسكەرسەك، ونىڭ ءار جاڭا مۇشەسى ءتوراعالىق ەتۋشى مەملەكەتكە جۇكتەلەتىن مىندەتتەردى دە ارتتىرا تۇسەرى ءسوزسىز.

شولۋشى: ايگەرىم تاۋباي