8-9 ماۋسىم كۇندەرىنە جوسپارلانعان شىۇ ءسامميتى مەن 9 ماۋسىمداعى «ەكسپو – 2017» كورمەسىنىڭ اشىلۋ سالتاناتىنا جۇڭگو حالىق رەسپۋبليكاسىنىڭ ءتوراعاسى سي سزينپين ارنايى كەلدى. وسىعان وري قامشى اقپاراتتىق اگەنتتىگى قازاقپارات جاريالاعان سي ءسزينپيننىڭ قازاق حالقىنا ىقلاسى تۋرالى ماتەريالدى ۇسىنادى. 

قحر ءتوراعاسى سي ءسزينپيننىڭ قازاقستانعا جانە قازاق حالقىنا دەگەن ايرىقشا قارىم-قاتىناسىنا اكەسى سي ءچجۋنسيۋننىڭ (1913-2002) قحر گانسۋ ولكەسى اقساي-قازاق اۆتونومدى ۋەزى باسشىسىنىڭ ورىنباسارى بولعان ساعيدوللا ەسىمدى قازاقپەن دوستىعى ىقپال ەتۋى مۇمكىن. 

قازاقپاراتتىڭ قىتايداعى مەنشىكتى ءتىلشىسى سادىق اكەجانوۆ گانسۋ ولكەسىنە جاساعان ساپارى بارىسىندا جەرگىلىكتى مۋزەيدەگى قازاق وتباسى مەن سي ءسجۋنسيۋننىڭ سۋرەتىنە نازار اۋدارعان بولاتىن. مۋزەيدىڭ جانە جەرگىلىكتى پارتيا كوميتەتى ناسيحات ءبولىمى قىزمەتكەرلەرىنىڭ ايتۋىنشا، سي چجۋنسيۋن جۇڭگو كومپارتياسى ورتالىق كوميتەتى سولتۇستىك-باتىس بيۋروسىنىڭ حاتشىسى بولعان كەزىندە، 1950 جىلدارى اقساي-قازاق اۆتونومدى ۋەزىن گانسۋدىڭ دۋنحۋان ۋەزىنەن بولەك شىعارۋ جۇمىستارىنا باسشىلىق جاساپ، ونىڭ ودان ارى دامۋىن باقىلاۋدا ۇستاعان. سول كەزدەگى اقساي-قازاق اۆتونومدى ۋەزى باستىعىنىڭ ورىنباسارى قازاق ساعيدوللا گانسۋ ولكەسىنىڭ اكىمشىلىك ورتالىعى لانچجوۋ قالاسىنا ءۇش رەت بارىپ، سي چجۋنسيۋنمەن كەزدەسكەن. 1958 جىلدىڭ 29 قىركۇيەگىندە سي چجۋنسيۋن كورشى وڭىرلەردى ارالاپ ءجۇرىپ، توسىننان اقسايعا كەلگەن جانە ول اقساي-قازاق اۆتونومدى ۋەزىن دامىتۋ ماسەلەسىن ارنالعان جيىن وتكىزگەن. تۇسكى استان كەيىن قوشتاسار كەزدە ساعيدوللانىڭ وتباسىمەن سۋرەتكە تۇسكەن. 2012 جىلدىڭ 20 شىلدەسىندە قكپ وك ۇيىمداستىرۋ ءبولىمى اقساي-قازاق اۆتونومدى ۋەزى پارتيا كوميتەتىنىڭ ۇيىمداستىرۋ بولىمىنە اتالعان سۋرەتتىڭ ءتۇسىرۋ جاعدايىن انىقتاۋ تۋرالى تاپسىرما بەرگەن. جاۋاپ الىنعاننان كەيىن قكپ وك ۇيىمداستىرۋ ءبولىمى تاريحشىلاردان ارنايى توپ جاساقتاپ، جۇڭگو ورتالىق تەليەۆيدەنيەسىنىڭ وپەراتورلارمەن اقساي قالاسىنا اتتاندىرعان. ولار سي چجۋنسيۋن تۋرالى دەرەكتى فيلم دايىنداۋ بارىسىندا ساعيدوللانىڭ وتباسى مۇشەلەرىنەن سۇحبات العان.

2013 جىلدىڭ 13 قازانىندا سي ءچجۋنسيۋننىڭ جۇبايى سي ءسيننىڭ شاقىرۋىمەن ساعيدوللانىڭ ۇلى 58 جاستاعى باقىت (سۋرەتتەگى اناسىنىڭ قولىنداعى بالا) قحر ءتوراعاسى اكەسىنىڭ 100 جىلدىق مەرەيتويىنا ارنالعان شاراعا قاتىسىپ، ونىڭ اناسىنىڭ ۇيىندە قوناقتا بولدى جانە قازاقتىڭ ۇلتتىق كيىمىن سىيعا تارتتى. 

«بۇگىنگى گانسۋ» كۇندەلىكتى گازەتىنىڭ جازۋىنشا، (اۆتورى سيۋ سياوشان) سي چجۋنسيۋن ءومىرىنىڭ سوڭعى جىلدارىندا اقساي-قازاق اۆتونومدى ۋەزىنە بارىپ، دوسىنىڭ وتباسىمەن كەزدەسۋگە نيەت تانىتقان. الايدا ءتۇرلى سەبەپتەرمەن بارا الماعان. ومىرىمەن قوش ايتىسار الدىندا ول ايەلىنە ساعيدوللانىڭ ءومىرى مەن ونىڭ وتباسى جاعدايىن مۇمكىندىگىنشە ءبىلۋدى وتىنگەن. ەندەشە، سي ءسزينپيننىڭ قازاق حالقىنا دەگەن قۇرمەتى اكە قانىمەن بەرىلگەن شىعار...