قازاقستان پرەزيدەنتى اقوردادا جۇڭگو پرەزيدەنتى سي ءسزينپيندى سالتاناتپەن قابىلدادى دەپ حابارلايدى قامشى ءتىلشىسى.

سالتاناتتى كەزدەسۋدە ەلباسى جۇڭگو ءتوراعاسىنا ەلىمىزگە 3ء-ىنشى رەت ساپارمەن كەلىپ وتىرعانى ءۇشىن العىس ءبىلدىردى. ەكى ەلدىڭ ساۋدا-ەكونوميكالىق قاتىناسى دامىپ جاتقانىن باسا ايتقان ەلباسى جۇڭگو مەن قازاقستاننىڭ «كەلىسە المايتىن ماسەلەسى جوق» ەكەنىنە ەرەكشە توقتالدى.

وسى ساتتە «سامۇرىق-قازىنا» اق مەن قحر حالىقارالىق ساۋداعا جاردەمدەسۋ كوميتەتى جانە «CITIC Group» كورپوراسياسى ۇيىمداستىرۋىندا قازاقستان-قىتاي ىسكەرلىك كەڭەسىنىڭ ءتورتىنشى وتىرىسى ءوتىپ جاتىر.

جۇڭگو پرەزيدەنتى كەشە كەشقۇرىم استاناعا كەلگەن بولاتىن. قحر ءتوراعاسىن اۋەجايدان ق ر پرەمەر-مينيسترىنىڭ ورىنباسارى اسقار ءمامين مەن ق ر سىرتقى ىستەر ءمينيسترى قايرات ءابدىراحمانوۆ قارسى الدى.

ەسكە سالساق، بۇل ەكى ەل باسشىلارىنىڭ سوڭعى ءبىر ايدا ەكىنشى رەتكى كەزدەسۋى. بۇعان دەيىن ەلباسى جۇڭگو توراعاسىمەن مامىردىڭ 14-ىندە بەيجىڭدە وتكەن «ءبىر بەلدەۋ – ءبىر جول» ەكونوميكالىق فورۋمى اياسىندا كەزدەسكەن ەدى.

جۇڭگو ءتوراعاسىنىڭ ەلگە كەلۋى قارساڭىندا 5 ماۋسىمدا ەلباسى كىتاپحاناسىندا سي ءسزينپيننىڭ «ەل باسقارۋ جونىندە» كىتابىنىڭ قازاق ءتىلدى نۇسقاسى تانىستىرىلعان بولاتىن. سونداي-اق، 6 ماۋسىمدا قازاقستان رەسپۋبليكاسىنىڭ تۇڭعىش پرەزيدەنتى ەلباسى كىتاپحاناسىندا نۇرسۇلتان نازاربايەۆتىڭ جۇڭگو تىلىنە اۋدارىلعان تاڭدامالى ەڭبەكتەر جيناعى تانىستىرىلدى.

«ەل باسقارۋ جونىندە» – قكپ وك باس حاتشىسى سي ءسزينپيننىڭ 2012 جىلدىڭ 15 قاراشاسىنان 2014 جىلدىڭ 13 ماۋسىمىنا دەيىن كوپشىلىك الدىندا سويلەگەن 79 ءسوزى، سۇحباتى، بايانداماسى، وقىعان ءدارىسى، قۇتتىقتاۋ حاتتارى ەنگەن قحر ءتوراعاسىنىڭ العاشقى كىتابى. بارلىق ماتەريالدار 18 تاراۋعا بولىنگەن جانە حرونولوگيالىق تارتىپتە ۇسىنىلعان. الەمدىك دامۋدىڭ كوشباسشىسىنا اينالعان قىتايداعى مەملەكەتتىك رەفورمالارعا ارنالعان باسىلىمعا جەر-جاھان جۇرتشىلىعى تاراپىنان قىزىعۋشىلىق ارتتى. بۇگىندە كىتاپ الەمنىڭ 25 تىلىنە (اعىلشىن، اراب، يسپان، نەمىس، جاپون، كارىس، ت.ب.) اۋدارىلعان.

ايتا كەتەتىن بولساق، 7-10 ماۋسىمعا جوسپارلانعان رەسمي ساپارى اياسىندا جۇڭگو ءتوراعاسى ەكسپو – 2017 ۇلتتىق كورمەنىڭ اشىلۋ سالتاناتىنا قاتىسادى. سونداي-اق، شانحاي ىنتىماقتاستىق ۇيىمى ەلدەرى باسشىلارى استانادا 8-9 ماۋسىم كۇندەرى شىۇ ءسامميتىن وتكىزەدى.

ەلباسى سامميت الدىندا شانحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرىن قابىلداعان ەدى.  كەزدەسۋگە قازاقستان رەسپۋبليكاسىنىڭ قورعانىس ءمينيسترى س.جاسۇزاقوۆ، جۇڭگو حالىق رەسپۋبليكاسىنىڭ قورعانىس ءمينيسترى چان ۆانسيۋان، رەسەي فەدەراسياسىنىڭ قورعانىس ءمينيسترى س.شويگۋ، تاجىكستان رەسپۋبليكاسىنىڭ قورعانىس ءمينيسترى م.شەرالي، وزبەكستان رەسپۋبليكاسىنىڭ قورعانىس ءمينيسترى ك.بەردييەۆ، قىرعىز رەسپۋبليكاسى باس شتابىنىڭ باستىعى ر.دۋيشەنبييەۆ، شانحاي ىنتىماقتاستىق ۇيىمىنىڭ باس حاتشىسى ر.اليموۆ قاتىسقان.

وعان قوسا بىشكەكتە شىۇ ەلدەرى ۇكىمەت باسشىلارىنىڭ كەزدەسۋى ءوتتى. بىشكەكتە وتكەن شانحاي ىنتىماقتاستىق ۇيىمى ۇكىمەت باسشىلارىنىڭ كەزدەسۋىندە ساۋدا-ەكونوميكالىق جانە ينۆەستيسيالىق قاتىناستى دامىتۋعا باعىتتالعان 12 قۇجاتقا قول قويىلدى.

شانحاي ىنتىماقتاستىق ۇيىمى (شىۇ) 2001 ج. قازاقستان، قىرعىزستان، جۇڭگو، رەسەي مەن تاجىكستان باسشىلارى شەكارا ايماعىنداعى اسكەري سالاداعى سەنىم شارالارىن نىعايتۋ تۋرالى كەلىسىم (شانحاي قالاسى، 1996 ج.) مەن شەكارا ايماعىنداعى اسكەري كۇشتەردى ءوزارا قىسقارتۋ تۋرالى كەلىسىمگە (ماسكەۋ قالاسى، 1997 ج.) قول قويعاننان كەيىن قالىپتاسقان «شانحاي بەستىگى» تەتىگىنىڭ نەگىزىندە قۇرىلدى.