بۇگىن شانحاي ىنتىماقتاستىق ۇيىمىنىڭ سامميتىنە قاتىسۋ ءۇشىن استاناعا وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ كەلدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ. 

شاۆكات ميرزيەيەۆتىڭ ۇشاعى استانا اۋەجايىنا كەلىپ قوندى. وزبەكستاننىڭ جاڭا پرەزيدەنتى ءوز لاۋازىمىنا كىرىسكەننەن بەرى ەكىجاقتى قارىم-قاتىناستى بەلسەندى دامىتا باستاعانىن بايقاۋعا بولادى. كورشى ەلدىڭ باسشىسىنىڭ ناۋرىز ايىندا استاناعا كەلىپ، ەلباسى نۇرسۇلتان نازاربايەۆپەن كەزدەسۋى سونىڭ ايقىن دالەلى. بۇگىن شاۆكات ميرزيەيەۆ شانحاي ىنتىماقتاستىق ۇيىمىنىڭ ءسامميتى مەن ەحرو-2017 حالىقارالىق كورمەسىنىڭ اشىلۋىنا قاتىسادى دەپ جوسپارلانىپ وتىر.

ەستەرىڭىزگە سالايىق، بىلتىر اۋقىمدى شارا تاشكەنت قالاسىندا وتكەن بولاتىن. شاۆكات ميرزيەيەۆ ءوز سۇحباتىندا قازاقستان وزبەكستاننىڭ ەڭ باستى ەكونوميكالىق ارىپتەستەرىنىڭ ءبىرى ەكەندىگىن ەرەكشە اتاپ وتكەن. ءقازىر ەكى ەلدىڭ قارىم-قاتىناستارى جاڭا قارقىنعا يە بولىپ جاتىر. وزبەكستاندا قازاقستاندىق كاپيتالى بار 230 كاسىپورىن جۇمىس ىستەيدى. ال بىزدە كورشى ەلدىڭ قاتىسۋىمەن اشىلعان 130 كاسىپورىن بار ەكەن. بولاشاقتا قوس مەملەكەت ءوزارا تاۋار اينالىمىن ارتتىرۋدى كوزدەپ وتىر. سىرتقى ساۋدا اينالىمى 2005 جىلدان 2013 جىلعا دەيىن 4 ەسەگە ارتىپ، 2 ملرد دوللاردان استى. ال ءقازىر بۇل كورسەتكىش 1،5 ملرد دوللارعا تەڭ.

ەستەرىڭىزگە سالا كەتەيىن، بيىل استانادا قازاقستان مەن وزبەكستاننىڭ بيزنەس فورۋمى ءوتتى. بۇل اۋقىمدى شارا بارىسىندا تاراپتار سوماسى 840 ملن دوللاردى قۇرايتىن 91 كەلىسىمشارتقا قول قويىلدى. ەكى ەلدىڭ پرەزيدەنتتەرى كەزدەسكەننەن كەيىن 2020 جىلعا دەيىن تاۋار اينالىمىن 5 ملرد دوللارعا دەيىن ارتتىرۋدى تاپسىردى. ءقازىر ءبىز وزبەكستانعا حيميالىق ونىمدەردى ەكسپورتتايتىن بولدىق. ال كورشى ەلدەن بىزگە جەمىس-كوكونىستەر ەكسپورتى ءبىرشاما ارتتى. ارينە، باۋىرلاس، كورشىلەس حالىقتار اراسىنداعى تاريحي دوستىقتىڭ تامىرى تەرەڭدە ەكەندىگىن دە ايتا كەتكەن ءجون.

شولۋشى: ايگەرىم تاۋباي