ق ر پارلامەنتى سەناتىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى، دەپ حابارلايدى قازاقپارات. قۇجاتتى ق ر پارلامەنتى ءماجىلىسى دەپۋتاتتارىنىڭ توبى ازىرلەدى. «زاڭ جوباسىن ماجىلىستە تالقىلاۋ بارىسىندا قۇجات قوسىمشا نورمالارمەن تولىقتىرىلىپ، وندا نەگىزسىز شەكتەۋلەر جويىلدى جانە جاڭاشىلدىقتار جولداعى ءتارتىپتى كۇشەيتۋگە ىقپال ەتەدى. كولىكتى پوليسەيلەر تالابى بويىنشا توقتاتقان جاعدايدا ولاردىڭ ءىس-قيمىلىنىڭ ءتارتىبى بەكىتىلەدى»،-دەپ توقتالدى زاڭ جوباسىن تانىستىرۋ بارىسىندا ءماجىلىس دەپۋتاتى ۆلاديسلاۆ كوساريەۆ.
اتاپ ايتقاندا، كولىك قۇرالىن توقتاتقاننان كەيىن قىزمەتكەر كىدىرمەي وعان جاقىن كەلۋگە، ءوزىن تانىستىرۋعا، جۇرگىزۋشىنىڭ تالاپ ەتۋى بويىنشا قىزمەتتىك كۋالىگىمەن تانىس ەتۋگە، توقتاتۋ سەبەبىن تۇسىندىرۋگە، سونداي-اق پايدالانىلعان جاعدايدا ەرەجە بۇزۋشىلىقتى تىركەگەن قۇرالداردىڭ مالىمەتتەرىن ۇسىنۋعا مىندەتتى. بۇدان وزگە، زاڭ جوباسىمەن كولىكتى توقتاتقان كەزدە جۇرگىزۋشىنىڭ پوليسيا ءىس-قيمىلدارىن فوتواپپاراتقا جانە بەينە ءتۇسىرۋدى جۇرگىزۋگە قۇقىعى كوزدەلەدى. سونىمەن قاتار جولاۋشىلاردى تۇنگى ۋاقىتتا تۇراقتى ەمەس اۆتوتاسىمالدارمەن تاسىمالداۋعا جانە كولىك قۇرالدارىنداعى اەروگرافيكالىق سۋرەتتەرگە تىيىم سالۋلار الىپ تاستالدى. ماساڭ كۇيدە كولىكتى جۇرگىزگەنى ءۇشىن، سونداي-اق كۋالاندىرۋدان وتۋدەن باس تارتقان جۇرگىزۋشىلەردى كۋالىگىنەن ايىرۋدىڭ ءبىرىڭعاي ءۇش جىلدىق مەرزىمى بەلگىلەنۋدە. مۇنىمەن قوسا، جۇرگىزۋشى كۋالىگىنىڭ جارامدىلىق مەرزىمى ءوتىپ كەتكەن جاعدايدا قايتا ەمتيحان تاپسىرۋ تالابىن الىپ تاستاۋ كوزدەلگەن.
پىكىر قالدىرۋ