قىتايلىق «سينحۋا» اقپاراتتىق اگەنتتىگى قازاقcتاندىق قىز بەن جۇڭگو جىگىتىنىڭ ماحاببات حيكاياسى تۋراسىندا بەينەروليك تۇسىرگەن ەكەن. بۇل جايىندا جۇڭگو پرەزيدەنتى سي سزينپين ايتتى.

پرەزيدەنتتىڭ سوزدەرىنە قاراعاندا، جۇڭگو جىگىتى مەن قازاقستاندىق قىزدىڭ ماحابباتىن كورسەتۋ ارقىلى ەكى ەلدىڭ ىنتىماقتاستىعىن كورسەتپەك بولعان.

بەينەروليكتەگى وقيعا جەلىسى مىناداي: سينزياندىق جاس جۇڭگو جىگىتى جەرگىلىكتى اۋرۋحانادا ۆالەنتينا ەسىمدى ارۋدى كوزى شالىپ، عاشىق بولىپ قالادى. اقىرى ەكەۋى باس قوسىپ، دۇنيەگە ۇلدارى كەلەدى. ۇلدارى 6 جاسقا تولعاندا ۆالەنتينا ساياسي جاعدايلارعا بايلانىستى ەلىنە قايتۋعا ءماجبۇر بولادى. ۇلدارى ەر جەتىپ، ءوز اناسىن ىزدەي باستايدى. تەك 2009 جىلى ۇلى 61 جاسقا كەلگەندە 80 جاستاعى اناسىن الماتىدان تابادى. ءسويتىپ ۆالەنتينانى قىتايعا اپارىپ، اسپان استى ەلىنىڭ جايلىلىعىن كورسەتەدى.

«بىرنەشە جىلداردان كەيىن باقىتقا كەنەلگەن بۇل وتباسىنىڭ تاعدىرى – قازاقستان مەن جۇڭگو تۇرعىندارى اراسىنداعى اجىراماس دوستىقتىڭ كورىنىسى» دەپ ايتتى بەينەروليك جايىندا جۇڭگو پرەزيدەنتى.

ءيا، قازاقستان مەن قىتايدىڭ دوستىق قارىم-قاتىناسىن كورسەتەمىز دەپ تىرىسىپ باعىپتى. ءبىراق سول دوستىقتى قىز بەن جىگىتتىڭ ماحابباتى ارقىلى كورسەتكەندەگى ويلارىنىڭ تەرەڭىندە نە جاتقانىن كىم ءبىلسىن؟ مۇنىڭ دا استارىندا جۇڭگو حالقىنىڭ قۇيتىرقى ساياساتى جاتقان جوق پا دەپ قالاسىڭ.

قازاقستاندىق قىزدار جۇڭگو جىگىتتەرىن قىزىقتىرادى ەكەن

ەسكە سالا كەتەيىك، قاڭتار ايىنداعى قازاقستاندىق قىزدارعا جۇڭگو دوكەيلەرىنە تۇرمىسقا شىعۋدى ۇسىنعان حابارلاندىرۋ الەۋمەتتىك جەلىلەردى ءدۇر سىلكىندىرگەن. فەيسبۋك الەۋمەتتىك جەلىسىندەگى «دوسكا وبياۆلەنيي الماتى، استانا» پابليگىندە مىناداي مازمۇنداعى حابارلاما جاريالانعان: «18-40 جاس ارالىعىنداعى باسى بوس قىزدار! بەيجىڭ تۇرعىنى، ءارى بويداق ەر جىگىتكە تۇرمىسقا شىققىڭىز كەلە مە؟ بىزگە حابارلاسىڭىز. بەيجىڭدەگى دوكەي جىگىتتەر توبى استاناعا وتباسىن قۇرۋ ءۇشىن كەلە جاتىر. ارنايى بىرنەشە شارالار دايىنداپ جاتىر. ەر ادامدار باقۋاتتى ءومىر سۇرەدى، ەۋروپالىق ءبىلىمى بار، اعىلشىن، ورىس تىلدەرىن جەتىك مەڭگەرگەن».

مۇنداي اقپاراتقا اشىنعان قازاق حالقى نارازىلىعىن ءبىلدىرىپ، نە ءبىر پىكىرلەرىن قالدىرعان. وسى جارناماعا بايلانىستى قازاقستانداعى قحر ەلشىسى چجان حانحۋەي دە ءوز پىكىرىن بىلدىرگەن ەدى. اتالمىش ۇيىمنىڭ بار-جوعىنان حابارى جوق ەلشى قازاقستاندىق قىزدارعا جۇڭگو جىگىتتەرى قاتتى قىزىعاتىنى جايىندا ايتىپ قالعان.

«قازاقستاننىڭ قىزدارى وتە ادەمى، نازىك. ولاردىڭ ءبىلىمى جوعارى، شىعىس مەنتاليتەتى بار. ولار وتباسىن جاقسى كورەدى، اتا-اناسىن قۇرمەتتەيدى، ۇلكەندەردى سىيلاي بىلەدى»، دەي كەلە، ەكى ەل اراسىندا ءداستۇر بويىنشا ۇقساستىقتار بارىن ايتىپ قازاق جۇرتشىلىعىن ەسىنەن تاندىرعان.

بۇل قىتايلىقتاردىڭ قازاق قىزدارىنا دەگەن قىزىعۋشىلىعىن دالەلدەيتىن مىسالدىڭ 10-نان 1ء-ى عانا. ونى جازا بەرسەك، جىرى تاۋسىلماس.

ۇلكەندەرىمىز قارسىلىق تانىتىپ، ەر جىگىتتەرىمىز نارازىلىعىن ءبىلدىرىپ، قىتايعا كەتكەن قازاق قىزىن، ءتىپتى «جەزوكشەگە» بالاعاندار دا بولدى.

نە كەرەك، بۇگىندە قازاقستاننىڭ قانشاما قاراكوزدەرى جۇڭگو ۇلتىنىڭ ۇرپاعىن تاربيەلەپ، جۇڭگو شاڭىراعىنىڭ وتاناسى اتانعان. قىتايمەن باس قوسىپ، بويىنان قازاقتىقتى جويعاندارى دا جەتىپ ارتىلادى.

جوق، قىتايدى مۇلدەم جولاتپاۋ كەرەك دەگەن تۇسىنىكتەن ادامىن. دوستىق قارىم-قاتىناس كەز-كەلگەن مەملەكەتتەر اراسىندا اسا قاجەت-اق، الايدا دوستىقتان اسپاۋ كەرەك شىعار. اجەلەرىمىز بەن انالارىمىزدىڭ ارىن وزگە ۇلت وكىلىنىڭ ازاماتى تاپتامادى، اجەلەرىمىز قازاقتىڭ تەكتى ۇرپاعىن دۇنيەگە اكەلدى، بويىنا ەلگە دەگەن سۇيىسپەنشىلىكتى دارىتىپ ءوسىردى ەمەس پە؟! قور بولعان جوق قوي. قالتاسىنداعى بايلىعىن كورسەتىپ، قازاقستان قاراكوزدەرىن تۇزاعىنا تۇسىرمەك ويلارى بار جۇڭگو حالقى تىنىش جاتار ەمەس. جاي عانا حابارلاندىرۋدان باستاپ، ساياساتقا دەيىن تابان تىرەپتى. قىتايى بولسىن، باسقاسى بولسىن، ەلدەر اراسىنداعى ىنتىماقتاستىقتى ماحاببات شەشپەك ەمەس. قىتايدىڭ كەزەكتى ساياساتىنىڭ قۇربانى بولىپ جۇرمەيىك.

گۇلىم جاقان