يەمەندە قارۋلى قاقتىعىستار مەن حالىقتىڭ تۇرمىسى ناشارلاۋى سالدارىنان كامەلەت جاسقا تولماعان قىزداردى ۇلكەن جاستاعى ەر ادامدارعا تۇرمىسقا بەرۋ كۇشەيىپ كەتكەن. مالياك ەسىمدى 10 جاستاعى قىز 70 جاستاعى  كارى شالمەن اتاستىرىلىپ قويعان. الايدا اناسىنىڭ شارق ۇرىپ كومەك سۇراۋىمەن «يەمەن ايەلدەر كەڭەسى» ۇيىمى قىزدى جاسىرىپ ۇستاپ وتىر.

- «مەن قىزىمنىڭ ەرتە  تۇرمىس قۇرۋىنا قارسىمىن. ول ءالى بالا، ول مەكتەپكە بارۋى كەرەك، ءبىلىم الۋى كەرەك، ونىڭ جاسى نەبارى 10-دا. ول ءالى كۇيەۋ ، جىگىت دەگەننىڭ كىم ەكەنىن دە بىلمەيدى. ول امان قالماس ەدى. اكەسى اقكوڭىل مۇسىلمان بولىپ كورىنگىسى كەلگەنمەن، وعان تەك اقشا كەرەك. مىنە 2 جىل بولدى مالياك مەكتەپكە بارماي وتىر. اكەسى ۇستاپ الىپ، تۇرمىسقا كۇشتەپ شىعارادى ما دەپ قورقامىز»، -دەپ مالىمدەدى مالياكتىڭ اناسى ناسرين.

ەڭ قورقىنىشتىسى، 70 جاستاعى ەر ادام مالياكتىڭ اتاسىمەن جاستى. ەگەر وسى نەكە قيىلار بولسا، قىزدىڭ اكەسى 4 مىڭ دوللار الادى. ال بۇل قارجى يەمەننىڭ كەدەي حالقى ءۇشىن ۇلكەن اقشا. وسى ءىستىڭ جالعاسى نە بولارىن بىلمەگەن انا مەن قىز بۇگىندە بەلسەندىلەردىڭ قول استىندا جاسىرىنۋدا.

يەمەندەگى سوعىس سالدارىنان ەلدەگى 18 جاسقا تولماعان قىزداردىڭ 72 %-ى تۇرمىستا. ال 15 جاسقا تولماعان قىزداردىڭ 44 %-ى ەگدە جاستاعى ەر ادامدارعا تۇرمىسقا شىعۋعا ءماجبۇر بولعان.  تاعى ءبىر ايتا كەتەتىن جايت،قىزداردىڭ انالارى كۇيەۋلەرىنىڭ ايتقانىنا شىعا الماي امالسىز كەلىسىپ وتىر.

يەمەن- وڭتۇستىك-باتىس ازيادا ورنالاسقان مەملەكەت. حالىقتىڭ 99 %-ى مۇسىلماندار.

ەلدە اكەلەرى ءوز قىزدارىن ساۋداعا سالىپ، قاتىگەزدىككە بارۋدا. يەمەندە ورىن العان  8 جاستاعى قىزدىڭ ءولىمى الەم تالقىسىنا تۇسكەن بولاتىن. ايتا كەتسەك، 8 جاستاعى قىز 40 جاستاعى ەر ادامعا تۇرمىسقا شىعىپ، العاشقى نەكە تۇنىندە كوز جۇمعان. 

دايىنداعان: ايگەرىم تاۋباي