تۇرىك رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگى (TIKA) استاناداعى «شاراپات» الەۋمەتتىك قىزمەت كورسەتۋ ورتالىعىندا اۋىزاشار بەردى، دەپ حابارلايدى قازاقپارات. اگەنتتىكتىڭ وكىلى ءالي يحسان چاگلاردىڭ ايتۋىنشا، بيىلعى رامازان ايىندا وسىنداي قايىرىمدىلىق استارىن قازاقستان بويىنشا 5،5 مىڭ ادامعا ۇيىمداستىرۋ جوسپارلانۋدا - قارتتار ۇيلەرىنىڭ تۇرعىندارىنا، ەلدىڭ ءارتۇرلى قالالارىنداعى از قامتاماسىز ەتىلگەن جاندار مەن قاريالار ءۇشىن.

«ءبىزدىڭ مەكەمەدە 12 ۇلتتىڭ 300-گە جۋىق وكىلى تۇرادى. ولاردىڭ 100-گە جۋىعى مۇسىلماندار. ولار قارتتار مەن مۇگەدەك جاندارعا ءداستۇرلى تۇردە كورسەتىلەتىن قامقورلىق ءۇشىن ەلىمىز پرەزيدەنتىنە، ۇكىمەتكە جانە استانا اكىمدىگىنە شەكسىز العىس ايتادى. مەنىڭشە، ءبىزدىڭ مەملەكەتتە قاريالار مەن مۇگەدەكتەرگە قارىم-قاتىناس ەرەكشە. مىنە، بۇگىندە وسىنداي ءىس-شارانى ۇيىمداستىرۋشىلارعا العىستارىن بىلدىرۋدە. اۋىزاشاردى بۇعان دەيىن بىرنەشە مەشىت پەن كاسىپكەرلەر ۇيىمداستىرعان بولاتىن. بۇگىن ونى تىكا تۇرىك اگەنتتىگى قولعا الدى»، - دەدى ورتالىق ديرەكتورى كەنجەبولات باپىشيەۆ. ءىس-شاراعا سونداي-اق تۇركى رەسپۋبليكاسى ەلشىلىگىندەگى ءبىلىم جانە عىلىم مينيسترلىگىنىڭ وكىلى مۇستافار قالقان دا قاتىستى. ول ورتالىق تۇرعىندارىن رامازان ايىمەن قۇتتىقتاپ، ولارعا ىزگى-تىلەكتەرىن ءبىلدىردى.