«جۇڭگو مەن قازاق ەلى اراسىندا ۇلى جىبەك جولى بويىندا ساۋدا-ساتتىق، ەكونوميكالىق باعىتتاردى ايقىندايتىن كەزدەسۋ ءوتتى، بۇل جينالىستا ۇلتى جۇڭگو ازاماتتاردىڭ قازاقستان ازاماتتىعىن الۋدى كوزدەيتىندەرى دە انىقتالدى»، - دەپ حابارلايدى الماتى ارناسى.

الماتىدا جۇڭگو ازاماتتارىنىڭ سانى كوبەيگەن. بيىل قالادا 18 مىڭنان استام جۇڭگو كىرمەلەرى تىركەلسە، ونىڭ 13 مىڭنان استامى جەكە شارۋامەن كەلگەن. ال، 300-گە تارتا جۇڭگو كاسىبىنىڭ ءناسىبىن كورۋدە. تىپتەن قازاق قىزدارىنا ۇيلەنىپ، تۇراقتانىپ قالار ويى دا بار. بۇگىندە ەل ازاماتتىعىن العان 244 جۇڭگو ازاماتى تۇپ-تامىرىمەن الماتىدا عۇمىر كەشىپ جاتىر ەكەن. «اعىمداعى جىلدىڭ 9 ايىندا ەلىمىزگە 18 726 جۇڭگو ازاماتى كەلگەن. ول بىلتىرعى جىلدىڭ وسى ۋاقىتىمەن سالىستىرعان ەداۋىر كوپ. 697 ازامات اكىمشىلىك جازاعا تارتىلدى.ادەتىنشە، ولار ايىپپۇل تولەۋلەرى ءتيىس بولاتىن. وسىدان تۇسكەن قاراجات كولەمى 6 ميلليوننان استى»، - دەپ مالىمدەگەن الماتى قالالىق كوشى-قون پوليسياسى باسشىسىنىڭ ورىنباسارى جاندوس تۇرىسبەكوۆ. 

«الماتى قىتايلانىپ بارا جاتىر» دەپ قازاق جۋرناليستەرى دابىل قاققالى تالاي بولدى.  دۇنيەجۇزى تۇگەلدەي قاۋىپتەنەتىن قىتايلىقتار  قازاقستانعا ايتەۋىر وپ-وڭاي-اق كەلەدى. ولاردىڭ ەمىن-ەركىن كەلىپ جاتقاندارى بىلاي تۇرسىن، ءبىزدىڭ الدەبىر پىسىقايلار ەل توپىراعىنا تابانى تيمەگەن قىتايلارعا ۇشاقپەن بۋما-بۋما ازاماتتىق جىبەرىپ بەرمەك بولعانى دا بار. «قازاق قىزىنا ۇيلەنگەن»، «قازاقستان ازاماتتىعىن العان» دەگەن تىركەستەر قوسا ايتىلاتىن «جۇڭگو» تەرمينىنە بارعان سايىن قۇلاعىمىز ۇيرەنىپ بارا جاتىر. ءۇش قازاعىنىڭ بىرەۋى شەتەلدە شاشىراعان، ەلگە كەلۋگە نيەتتى قانداستارىنىڭ قۇقىعى كەز-كەلگەن شەتەلدىكپەن بىردەي، دەموگرافيالىق ءوسىمى وتە جاقسى كورسەتكىشتى كورسەتىپ جاتپاعان «ماڭگىلىك ەلدىڭ» جۇڭگو ماسەلەسىنە ءسال قاراۋىنا بولمايدى. ءۇش ايدان ارتىق تىركەۋگە تۇرعىزباي، ورالمانىن قۋىپ سالاتىن ۇكىمەت - قىتايلاردىڭ قادامىن قاداعالاۋسىز قالدىرماسا ەكەن دەيمىز.