قاراعاندى وبلىسى ۇلىتاۋ اۋدانىندا «اق بوكەن» تابيعي قورىعىندا قوعامدىق ۇيىمداردان قۇرىلعان قورىقشى قىزمەتىنىڭ ەرىكتى-ينسپەكتورلارىنىڭ كولىگى ورتكە وراندى، دەپ حابارلايدى قامشى اقپاراتتق اگەنتتىگى قازاقپاراتقا سىلتەمە جاساپ.

«بۇگىن تاڭەرتەڭ قورىق اۋماعىندا ينپەكتورلار جۇمىس  بارىسىندا براكونەرلەرمەن قاقتىعىسىپ قالعان. ءبىر ەكيپاجعا وق اتىلدى.  ارتىنشا ءبىر ادام كولىكتەن ءبىزدىڭ ماشيناعا بەلگىسىز زات لاقتىردى. ماشينادا بىردەن وت تۇتاندى. ادامدار زارداپ شەككەن جوق. كولىك تولىقتاي ورتەنىپ كەتتى. براكونەرلەردىڭ كولىگىندە ءنومىر بولعان جوق. تەك سۇر ءتۇستى لەند كرۋزەر، 105-شاناق (كۋزوۆ) ەكەنى بەلگىلى»، - دەپ حابارلادى جوبا جەتەكشىلەرىنىڭ ءبىرى مارعۇلان سەيسەمباي.

الايدا ينسپەكتورلاردان كولىكتى بەلگىسىز بىرەۋلەردىڭ قۋدالاعانى، كولىكتى قاساقانا جاعىپ جىبەرگەنى تۋرالى شاعىم تۇسكەن جوق. «بۇل فاكتى ىشكى ىستەر ورگاندارىندا تىركەلگەن جوق. ءقازىر قورىققا ۇلىتاۋ پوليسيا ءبولىمىنىڭ قىزمەتكەرلەرى شىقتى. اتىس پەن ءورت جايلى مالىمەتتى قازىرگى كەزەڭدە تەرىسكە شىعارىپ، نە راستاي المايمىز. بارلىعى انىقتالۋ ۇستىندە. ءىس ءىىد باسشىلىعىنىڭ باقىلاۋىنا الىندى»، - دەپ حابارلادى ءىىد باسپا ءسوز قىزمەتىنىڭ باسشىسى باقىتجان قۇدياروۆ.

قورىقتىڭ رەسمي دەرەكتەرىنە سايكەس ول جارتى جىل بۇرىن قۇرىلعان. قاراماعىندا 1 200 000 گەكتار ەرەكشە قورعالاتىن اۋماق بار. ول جەرلەردە بالىق اۋلاۋعا، اڭشىلىقپەن اينالىسۋعا تىيىم سالىنعان. اۋماقتى قورعاۋ ءۇشىن قازاقستاندىق كومپانيالاردىڭ قولداۋىمەن ۋاز جانە كاماز-كۋنگا كولىكتەرى ساتىپ الىنعان. سونداي-اق 11 ادامنان تۇراتىن ينسپەكتورلار كومانداسى جاساقتالعان. ولار راسيا، GPS، ارنايى فورمامەن جابدىقتالعان.