امەريكالىق New York Post باسىلىمى «ماركو پولونىڭ جىبەك جولى» اتتى قازاقستاندىق عىلىمي-كوپشىلىك ءفيلمىنىڭ اقش-تاعى پرەمەراسى تۋرالى جازدى، دەپ حابارلايدى قامشى اقاپارتتىق اگەنتتىگى قازاقپاراتقا سىلتەمە جاساپ.

«ماركو پولونىڭ جىبەك جولى» تانىمال يتاليالىق ساياحاتشىنىڭ جەلىسىمەن 2016 جىلى قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ءتۇسىرىلدى»، - دەلىنگەن مادەنيەت جانە سپورت مينيسترلىگىنىڭ تاراتقان حابارلاماسىندا.

فيلم نيۋ-يوركتە ورىس-امەريكالىق قورىنىڭ باستاماسىمەن مادەنيەت جانە سپورت مينيسترلىگى قازاق عىلىمي-زەرتتەۋ مادەنيەت ينستيتۋتىمەن ۇزاقمەرزىمدى ارىپتەستىگىنىڭ اياسىندا كورسەتىلگەن بولاتىن.

«ءبىز ءۇشىن نيۋ-يوركتە قازاقستاندىق ءفيلمدى ۇسىنۋ ۇلكەن مارتەبە. ءسوزسىز، بۇل تۋىندى امەريكالىق كورەرمەندەردىڭ ۇلكەن قىزىعۋشىلىعىنا يە بولادى. سەبەبى ۇلى جىبەك جولىنىڭ تاريحى قۇپيالارعا تولى. وندا ەجەلگى وركەنيەتتەر پايدا بولدى جانە جويىلىپ جاتتى. ونىڭ بويىندا بەلگىسىز شەبەرلەر قۇنى جەتپەس مادەني ەسكەرتكىشتەر سالىپ كەتتى، تانىمال ساياحاتشىلار كەرەمەت جاڭالىقتار اشتى»، - دەدى ورىس-امەريكالىق قورىنىڭ پرەزيدەنتى مارينا كوۆاليەۆا.

«ماركو پولونىڭ جىبەك جولى» عىلىمي-كوپشىلىك ءفيلمى ايگىلى يتاليالىق كوپەس ماركو پولونىڭ ۇلى دالا ساياحاتتارى تۋرالى كىتابىنىڭ جەلىسى نەگىزىندە تۇسىرىلگەن. فيلمدە ورتالىق ازيا مەن قازىرگى قازاقستان شەكاراسىنا ەرەكشە نازار اۋدارىلعان. رەجيسسەرلىك شەشىم عىلىمي پىكىرتالاس پەن تاريحي قايتا قۇرۋدى ۇشتاستىرۋدىڭ نەگىزىندە قۇرالعان.

«ماركو پولو اتالمىش كىتاپتىڭ اۆتورى بولعاندىقتان عانا ەمەس، ازيا مەن ەۋروپانى، كوشپەلى جانە وتىرىقشى مادەنيەتتەردى بايلانىستىرعان ءىرى تاريحي تۇلعا بولعاندىقتان، ۇلكەن قىزىعۋشىلىققا يە. ازيا ەۋروپالىقتار ءۇشىن كوپ عاسىرلار بويى بەلگىسىز بولىپ كەلدى. ولار ماركونىڭ كىتابى ارقىلى قىتايدى، ورتالىق جانە وڭتۇستىك-شىعىس ازيانى اشتى»، - دەيدى قازاق عىلىمي-زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ.

ميلان قالاسىندا افريكا، ازيا جانە لاتىن امەريكاسى فيلمدەرىنىڭ 27-فەستيۆالىندە ارنايى جۇلدەگە يە بولعان ءفيلمنىڭ ەكسكليۋزيۆتى كورسەتىلىمى نيۋ-يوركتىڭ ۇلتتىق ونەر قوعامىندا 2017 جىلدىڭ 8 ماۋسىمىندا ءوتتى.

اتالمىش بەدەلدى قوعامدىق ۇيىم اقش-تىڭ ونەردى دامىتۋ سالاسىنداعى ەڭ ەجەلگى ۇيىمدارىنىڭ ءبىرى. وعان تانىمال رەجيسسەر مارتين سكورسەزە، اكتەرلەر - يتان حوۋك، روبەرت رەدفورد، ۋما تۋرمان، سونىمەن قاتار ءىرى امەريكالىق مۋزەيلەردىڭ باسشىلارى، تانىمال سۋرەتشىلەر، مادەنيەت قايراتكەرلەرى مۇشەلىك ەتەدى.