مەملەكەت باسشىسى بەلارۋس رەسپۋبليكاسىنىڭ پرەزيدەنتىمەن كەزدەسۋ بارىسىندا وعان شانحاي ىنتىماقتاستىق ۇيىمىنىڭ سامميتىنە جانە «استانا ەكسپو-2017» دۇنيە جۇزىلىك كورمەسىنىڭ اشىلۋىنا قاتىسۋ ءۇشىن قازاقستانعا كەلگەنىنە العىس ايتتى دەپ حابارلايدى قامشى اقپاراتتىق اگەنتتىگى akorda.kz-كە سىلتەمە جاساي وتىرىپ. 

– ەكى جارىم جىل ىشىندە ءتيىستى ينفراقۇرىلىمى بار تۇتاس ءبىر اۋدان سالىندى. كورمەگە قاتىسۋشىلار ءۇشىن تۇرعىن ۇيلەر، قوناق ءۇي كەشەنى، كونگرەسس-حول جانە وسى اۋقىمدى ءىس-شارانى وتكىزۋگە قاجەتتى باسقا دا عيماراتتار بوي كوتەردى. كورمەنى وتكىزگەن سوڭ بۇل جەردە استانا حالىقارالىق قارجى ورتالىعى جۇمىس ىستەيتىن بولادى، – دەدى نۇرسۇلتان نازاربايەۆ.  

قازاقستان پرەزيدەنتى حالىقارالىق كورمەنىڭ نەگىزگى يدەياسىنا توقتالىپ، كورمەنىڭ باستى نىسانى – «نۇر الەم» پاۆيلونىنداعى ەكسپوزيسيالار تۋرالى ايتتى.     

بەلارۋس رەسپۋبليكاسىنىڭ پرەزيدەنتى نۇرسۇلتان نازاربايەۆقا حالىقارالىق كورمەنىڭ اشىلۋىنا قاتىسۋعا شاقىرعانى ءۇشىن ريزاشىلىق ءبىلدىردى.  

– ءبىز پاۆيلونداردى ارالاپ كورىپ قانا قويماي، سىزدەردىڭ ەكسپوزيسيالىق كەشەندەر قۇرىلىسىنداعى تاجىريبەلەرىڭىزدى مۇقيات زەرتتەمەكپىز. ويتكەنى ءبىز دە حالىق شارۋاشىلىعى جەتىستىكتەرى كورمەسىن ۇيىمداستىرۋدى جوسپارلاپ وتىرمىز، – دەدى ا.لۋكاشەنكو.

سونىمەن قاتار، بەلارۋس پرەزيدەنتى نۇرسۇلتان نازاربايەۆتىڭ تاريحتى زەرتتەۋدە ادىلەتتىلىكتى قالپىنا كەلتىرۋگە جەتە كوڭىل بولەتىنىن اتاپ ءوتتى.

– ءسىز بۇرىنعى لاگەردىڭ ورنىندا «الجير» مۋزەيىن اشۋعا كوپ كۇش جۇمسادىڭىز. بۇل لاگەردە بۇرىنعى وداقتىڭ تۇكپىر-تۇكپىرىنەن ايدالىپ كەلگەن ادامدار قامالدى. ونىڭ ىشىندە بەلارۋسيادان كەلگەن ايەلدەر دە بولدى. بۇگىن ءبىز ءبىرقاتار حاتتار مەن تاعدىرى لاگەرمەن بايلانىستى ادامداردىڭ ءىس قاعازدارىن الا كەلدىك. بۇل – ماڭىزدى قۇجاتتار، – دەدى ا.لۋكاشەنكو.      

كەزدەسۋ سوڭىندا مەملەكەتتەر باسشىلارى ەكىجاقتى قاتىناستاردى دامىتۋدىڭ وزەكتى ماسەلەلەرىن دە تالقىلادى.

شولۋشى: اسەل وتەشوۆا