2017 جىلدىڭ ەڭ ايتۋلى وقيعالاردىڭ ءبىرى  ەكسپو  حالىقارالىق كورمەسى. كورمەنىڭ مەملەكەت ءۇشىن دە، قازاقستان تۇرعىندارى ءۇشىن دە ماڭىزى زور. بۇگىن، ياعني 9 ماۋسىم كۇنى حالىقارالىق كورمەنىڭ اشىلۋ سالتاناتى وتەتىنى حابارلانعان بولاتىن. قامشى اقپاراتتىق اگەنتتىگى Informburo.kz-كە سىلتەمە جاساپ ەكسپو كورمەسىنىڭ باستالۋىنا 24 ساعات قالعانداعى استانانىڭ تىرشىلىگىن نازارلارىڭىزعا ۇسىنادى.

قازاقستان رەسپۋبليكاسىنىڭ مەملەكەت باسشىسى، شىۇ-نا مۇشە مەملەكەتتەردىڭ باسشىلارى بۇگىنگى سالتاناتتى جيىننىڭ ايتۋلى قوناقتارى ، پاۆيلوندى ارالاعان العاشقى ساياحاتشىلار بولماق. سىيلى قوناقتارعا گيد بولىپ ەلباسىنىڭ ءوزى جۇرەدى دەپ كۇتىلۋدە.

ايتۋلى وقيعانىڭ اشىلۋ سالتاناتىن تىكەلەي ەفير مەن تەلەارنالاردان ەلىمىزدىڭ بارلىق تۇرعىندارى تاماشالاي الادى. الايدا كورمەنى تاماشالاۋعا 10 ماۋسىمنان باستاپ رۇقسات ەتىلگەن.

قالا ءىشى مەن كورمە ماڭى ەرەكشە رەجىمدەگى كۇزەتپەن قورعالۋدا. پوليسيا قىزمەتكەرلەرى مەن ۇلتتىق ۇلان ساربازدارىنىڭ قاراسى كوبەيۋدە. 

الداعى 90 كۇن ىشىندە ەڭ مىقتى قورعانىستا بولاتىن دا وسى كورمە بولۋ كەرەك.

بولجام بويىنشا الداعى 3 ايدا قاراپايىم كيىم كيگەن قىزمەتكەرلەر دە تىنىشتىقتى كۇزەتپەك. الدىن الا جاسالعان دايىندىق بويىنشا باستى نازار انتيتەرروريزممەن كۇرەس. كۇزەت كەزەكشىلىگىنە تۇسكەن ارنايى دايارلانعان يتتەردىڭ دە سانى ارتىپ، قارۋلى كۇزەت تە كورمەگە كەلۋشىلەردىڭ تىنىشتىعىن كۇزەتپەك.

ارنايى الەمدىك كورمە قارساڭىندا پوليسيا قىزمەتكەرلەرى جازدىق جاڭا كيىم ۇلگىسىنە كوشتى. ارنايى  جەلەتكە جاپونيا مەن وڭتۇستىك كورەيانىڭ قۇقىق قورعاۋشىلارىنىڭ كيىمىنە ۇقساس بولعانىنا قاراماستان ادەمى كورىنەدى.

قۇقىق قورعاۋشىلار ەكسپو كورمەسى رەسمي تۇردە اشىلعاننان كەيىنگى بىرنەشە كۇن بويىندا قاتاڭ تەكسەرىستەر جۇرگىزبەك. ەشقانداي وقىس جاعدايعا جول بەرمەس ءۇشىن تىرىسىپ باعاتىندارى انىق.

كوگالداندىرۋ ىسىنە كەلەر بولساق، قالا ءىشى ءبىرشاما اقساپ تۇر. ۇيىمداستىرۋشىلار «بولاشاقتىڭ ەنەرگياسىن» قالىپتاستىرۋ بارىسىندا قالاداعى كوشەلەردىڭ ماڭى جاسىل جەلەككە اينالاتىنىن مالىمدەگەن بولاتىن. ەكسپو-عا ارنايى جاسالعان ۆيدەوروليكتە دە جان-جاعىمىز جاسىل تۇسكە بويالىپ تۇر. ال شىن مانىندە قانداي؟

بىرنەشە گەكتار جەرگە كوز جۇگىرتسەڭ ۆيدەوروليكتەگى كوگال مەن قالانىڭ ىشىندەگى گۇلزاردىڭ ءبىرشاما ايىرماشىلىعى بايقالادى.

ايماقتى كوگالداندىرۋعا گيدروكوتەرىمنىڭ دە ەش پايداسى تيمەگەن. سەبىلگەن ءدان قۇرعاق توپىراققا ءتۇسىپ، قۋراپ كەتكەن.

ايماقتىڭ كوگالداندىرۋىنا جاۋاپتى ورتالىق اكەلگەن  ارنايى ءشوپتىڭ تۇپتەرىنىڭ ءوزى قۋراپ كەتكەن. جاپان دالاعا ۇقساپ قالىپ كەتكەن گۇلزار ىشىندەگى قۇرعاق جەر قۇرىلىستان كەيىنگى قوقىستى جاسىرۋعا شاماسى جەتپەي تۇر.

سۋلاندىرۋعا ارنالعان قۇرىلعىلار جاقىندا عانا ورناتىلعان. سوعان قاراماستان ىستەن شىققان. ونىڭ سەبەبى، اسىعىس ىستەلگەن ءىس بارىسىندا كوپشىلىك بىلەتىن ەرەجەلەردىڭ ساقتالماۋى.

ەكسپو كورمەسىندە سەمەنت، اينەك، شىنى مەن اسفالت كوپ. الايدا جاسىل ءشوپ ارا-اراسىندا قاراسىن كورسەتەدى. استاناعا كەلگەن قوناقتار جاسىل ايماقتى كورگىسى كەلسە ورتالىق ساياباقتارعا بارعانى ءجون.

قالا ىشىندەگى شاعىن باقتار مەن ساياباقتار ساياحاتشىلاردى قابىلداۋعا تولىقتاي دايىن.

«ابۋ-دابي پلازا» عيماراتىنان كورمەگە دەيىنگى جولعا جوسپار بويىنشا تاعى ءبىر ساياباق سالۋ كەرەك بولعان. الايدا بەلگىسىز سەبەپتەرمەن ساياباقتىڭ قۇرىلىسى باستالمادى. قۇرىلىسشىلار ارەڭ دەگەندە تۇركىستان مەن اقمەشىت كوشەلەرىندەگى قۇرىلىس جۇمىستارىن اياقتادى. ونىڭ سەبەبى قازاقستاننىڭ «شار» پاۆيلونىنا  اپاراتىن جولدى جالعاپ تۇرعان وسى ەكى كوشە .  كوشەلەر جوندەۋدەن ءوتىپ، كوركى كىرىپ قالعانى راس. الايدا كوشەدەگى قۇرىلىستىڭ قالدىقتارى كوپشىلىكتىڭ نازارىن وزىنە اۋدارىپ-اق تۇر.

ەكسپو-عا دايىندىق بارىسىندا بيىك قاباتتى عيماراتتاردىڭ اياقتالماعانى شەتەلدىك قوناقتاردى تاڭقالدىرۋى ابدەن مۇمكىن. كەلىسىم شارت بويىنشا 10 ماۋسىمعا دەيىن تۇرعىن ۇيلەردىڭ قۇرىلىسىن اياقتاپ، وتكىزۋ كەرەك بولعانداردىڭ قاتارىندا تانىمال برەندتەر دە بار.

«ابۋ-دابي پلازا» كورمەنىڭ اشىلۋىنان بۇرىن قۇرىلىسىن اياقتاماعان ەڭ ايتۋلى عيماراتتاردىڭ ءبىرى.

 جىل جاڭالىعى بولىپ وتىرعان كورمە قارساڭىندا اياقتالماعان قۇرىلىس، قوقىستار استانالىقتاردى ءبىرشاما قىنجىلتۋدا. اياقتالماعان قۇرىلىس پەن قۇرىلىس قالدىقتارى ءتىپتى استانانىڭ ەڭ ايتۋلى «ماڭگىلىك ەل» جوباسىنىڭ ماڭىندا دا جاتىر.

ەگەر 24 ساعات ىشىندە كوشەلەردىڭ ءبارى رەتكە كەلتىرىلمەسە  ەكسپو ماڭىنداعى قۇرىلىستىڭ سۋرەتتەرى جەلىنى شۋلاتۋى مۇمكىن.

اۋدارعان: ايگەرىم تاۋباي