54 جاستاعى دجەسسي تەندايي وۋك-لوۋن قالاسىنىڭ ماڭىنداعى بالالار اۋرۋحاناسىنىڭ كافەسىندە جۇمىس ىستەگەن. ءار جىل سايىن اۋرۋحاناداعى بالالار ءۇشىن ەرەكشە دۇنيەلەر ازىرلەپ ءجۇردى، ءار مەرەكەلەرىن كوتەرىڭكى كوڭىل كۇيدە وتكىزۋلەرىنە سەبەپكەر بولدى. ال بۇل جىلى بالالار ءۇشىن كۇتپەگەن توسىن سىي جاسادى.

وسى جىلعا دەيىن ايەل ادام اقشاسىن ۇنەمدەپ، بالالارعا ويىنشىق اپەرۋ ءۇشىن 5000 دوللارداي جيناعان. ونىڭ ۇستىنە، الگى ويىنشىقتاردى ءوزى ساتىپ العان.

«بالالاردى باقىتتى ەتۋ ءۇشىن قولىمنان كەلگەنىنىڭ ءبارىن ىستەۋىم كەرەك ەدى»، دەدى دجەسسي.

وتكەن جىلدىڭ 12 جەلتوقسانىندا تەندايي ويىنشىقتاردى بالالار اۋرۋحاناسىنا، سونداي-اق پارك ريدجدەگى ليۋتەراندىق گوسپيتالعا اپارىپ بەردى.

جەرگىلىكتى باق-تىڭ مالىمەتىنشە، ايەل ادام وسىعان ۇقساس توسىن سىيلاردى 2009 جىلدان بەرى جاساپ كەلگەن كورىنەدى.

العاشقى جىلى روجدەستۆودان بالاقايلارعا ارناپ 100 سىيلىق الدى. جىل سايىن سىيلىق سانىن ءوسىرىپ وتىرامىن دەپ وزىنە ۋادە ەتتى. ال 2017-دە 1300 سىيلىققا دەيىن جەتكىزدى.

«مەنىڭ مۇنى نەگە ىستەپ جۇرگەنىم قىزىقتىراتىن شىعار. جۇرەگىمە مەيىرىمدىلىكتى قۇدايدىڭ ءوزى سالدى. بىردە تەلەديدار قاراپ وتىرىپ، وزگەنىڭ كومەگىنە، قامقورلىعىنا مۇقتاج بالالاردى كوردىم. الەمدى ايتپاعاندا، ءوزىمنىڭ مەملەكەتىمدە قانشاما بالا كومەككە مۇقتاج ەكەنىن بىلە تۇرا، مەن الاڭسىز ۇيىقتاي الماس ەدىم. ءسويتىپ، اقشا جيناۋدى سول كۇننەن-اق باستاپ كەتتىم»، - دەدى دجەسي تىلشىلەرگە بەرگەن سۇحباتىندا.

تەندايي 19 جىل بويى چيكاگودا كۇيەۋىمەن ءومىر ءسۇرىپ كەلەدى. الايدا، ولاردىڭ بالالارى بولماعان. ال 18 جىل بۇرنى بالالار اۋرۋحاناسىنىڭ كافەسىنە جۇمىسقا ورنالاستى.

«ماسەلە بايلىقتا نە اقشادا ەمەس. مەن تەك بالالاردىڭ باقىتى ءۇشىن بارىنە دايىنمىن.  ولارعا قامقور بولاتىن ادام مىندەتتى تۇردە بولۋى ءتيىس. جانە سول ادام مەن ەكەنىمدى جۇرەگىم سەزدى. مەن باقىتتتىمىن. قۋانىشتان جۇزدەرىنە كۇلكى ۇيىرىلگەن بالاقايلاردى كورگەندە، باقىتىم ۇلعايا تۇسەدى. بالالار ءۇشىن ءومىرىمنىڭ سوڭىنا دەيىن قايىرىمدىلىقپەن اينالىسۋعا دايىنمىن».

شولۋشى: گۇلىم جاقان