ورالدا وتارشىلدىق ەزگىگە قارسى كۇرەسكەن باتىر، ايگىلى شەشەن سىرىم دات ۇلىنىڭ 275 جىلدىعىنا ارنالعان «ايبىندى جىگىتتەر-2017» اتتى ايماقتىق بايقاۋ مارەگە جەتتى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ. 

ماقسات – قول باستاعان كوسەم، ءسوز باستاعان شەشەن سىرىم باتىردىڭ ەسىمىن ۇلىقتاۋ ارقىلى ەل ىشىندەگى سەگىز قىرلى، ءبىر سىرلى، ونەرلى جاستاردى انىقتاۋ. بايقاۋعا اقتوبە، قىزىلوردا جانە باتىس قازاقستان وبلىسىنىڭ اۋداندارىنان كەلگەن 19 بەن 29 جاس ارالىعىنداعى 12 ۇمىتكەر قاتىستى. بايقاۋدىڭ ءبىرىنشى كۇنى. سايىسكەرلەر الدىمەن ساداقپەن نىسانا كوزدەۋ ارقىلى ءوز رەتتىك نومىرلەرىن انىقتادى. جىگىتتەردىڭ بىلەك كۇشى ۇلتتىق ويىندار ارقىلى سىنالدى. اۋدارىسپاق – كۇش-جىگەرمەن قوسا اسقان ەپتىلىكتى تالاپ ەتەتىن سپورت ءتۇرى. سوندىقتان بولار، ۇمىتكەرلەردىڭ بۇل كەزەڭگە مىقتاپ دايىندالعانى بايقالدى.    

ولجاس تاسبەرگەن، بايقاۋعا قاتىسۋشى: - ارنايى وسى شاراعا بايلانىستى قىزىلوردا وبلىسىندا اۋدارىسپاققا دايىندالدىم. ورال قالاسىنا جەڭەمىن دەگەن ۇمىتپەن، جالىنداعان جىگەرمەن كەلىپ وتىرعان جاعدايىم بار.

 بايقاۋدىڭ ەكىنشى كۇنى. وتارشىلدىققا قارسى كۇرەستە دانا دا دارا، كوسەم دە شەشەن، باتىر دا بي رەتىندە تانىلعان سىرىم دات ۇلى ءىزباسارلارىنىڭ ساحنا تورىندە سىنالعان شاعى. «تەگىمدى مەنىڭ سۇراساڭ» تۋرىندا ۇمىتكەرلەر وزدەرىن كورەرمەنگە ءارتۇرلى قىرىنان تانىستىرۋعا تىرىستى. «ەسكىرمەيتىن ەستى ءسوز» سىنى سايىسكەرلەردىڭ باتىردىڭ شەشەندىك ونەرىمەن قانشالىقتى تانىس ەكەندىگىن انىقتاپ بەردى.  

  ءانۋار مۇستافين، بايقاۋ جۇلدەگەرى، اقتوبە وبلىسى: - سىرىمداي دانا بابامىز – تىلگە شەشەن، باتىر. ايتىسىمىز بار، وسى ايتىس ارقىلى بالالار شەشەندىگىن تانىتادى. مەدحات قامبەتوۆ، وبلىستىق حالىق شىعارماشىلىعى ورتالىعىنىڭ ديرەكتورى: - بايقاۋدىڭ ماقساتى – ەگەمەندىگىمىزدىڭ ارقاسىندا سالت-داستۇرلەرىمىز نەمەسە جىگىتتەردىڭ جىگىتتىگىن كورسەتەتىن ۇلتتىق ويىنداردىڭ شەبەرلىگىن بايقاۋ. ساحنا شەبەرلىگى وسى جەردە تارازىعا تۇسەدى.

 بايقاۋدىڭ ءتورتىنشى، ياعني سوڭعى كەزەڭى «تاس شايناپ، قۇم تۇكىرگەن» دەپ اتالدى. مۇندا سايىسكەرلەرگە قانداي دا ءبىر ونەرىمەن كورەرمەندى تاڭعالدىرۋ مىندەتى قويىلدى. ناتيجەسىندە جۇبانىش تۇيمەشوۆ، ءانۋار مۇستافين مەن دوسجان ۇمبەتوۆتار ۇزدىكتەر ساپىنان كورىندى. ال بىلەك كۇشىمەن قوسا شەشەندىگىمەن دارالانعان زەلەنوۆ اۋدانىنىڭ وكىلى اقتىلەك سارسەنوۆتى قازىلار بايقاۋ جەڭىمپازى دەپ تانىدى.

شولۋشى: ايگەرىم تاۋباي