الماتى قالاسىندا قازاق-قىتاي مادەني بايلانىسى مەن «2017 قازاقستانداعى جۇڭگو كينو فەستيۆالى» اياسىندا شىڭجاڭ كينو اپتالىعىنىڭ تۇساۋكەسەرى ءوتتى دەپ حابارلايدى قامشى ءتىلشىسى.
كينو اپتالىعىن تۇساۋ كەسەرىنە جۇڭگو ورتالىق تەليەۆيزياسى باسشىسى ني چەنسي، الماتىداعى جۇڭگو كونسۋلدىعىنىڭ باسشىسى جاڭ ۆەي، «قازاقفيلم» كينوستۋدياسىنىڭ ساراپشىلار كەڭەسىنىڭ ءتوراعاسى بەكبولات شەكەروۆ، الماتى ءماسليحاتىنىڭ حاتشىسى قالدىباي قازانبايەۆ جانە قازاقستاننىڭ حالىق ءارتىسى ءاسانالى ءاشىموۆ قاتىستى. اشىلۋ سالتاناتىندا ءسوز سويلەگەن قوناقتار ەكى ەلدىڭ مادەني بايلانىسى جاندانىپ كەلە جاتقانىنا ەرەكشە توقتالدى.
اشىلۋ سالتاناتىنا كەلگەن قوناقتارعا ارىسلان ابدۋكەريمنىڭ «اقشانىڭ الەگى» ءفيلمى قويىلدى.
كينو اپتالىق قحر باسپا ءسوز، باسپا، راديو، كينو جانە تەليەۆيزيا ءىسى جونىندەگى مەملەكەتتىك باسقارماسى، قازاقستانداعى قحر ەلشىلىگى، ق ر مادەنيەت جانە سپورت مينيسترلىگىنىڭ قولداۋىمەن 10 -25 ماۋسىم كۇندەرى وتەدى
«شىڭجاڭ كينو اپتالىعى «2017 قازاقستانداعى جۇڭگو كينو فەستيۆالى» اياسىندا وتەتىن مادەني شارالارىنىڭ ءبىرى رەتىندە جۇڭگو جانە قازاقستان تاراپىنان جان-جاقتى قولداۋ تاۋىپ، قازاقستان مەن قحر شىڭجاڭ كينو سالاسىنداعى تاجىريبە الماسۋ مەن مادەني ىنتىماقتاستىعىنىڭ الاڭىنا اينالدى. سونىمەن قاتار، مۇنىڭ قازاقستان كورەرمەندەرىنىڭ قىتايدى، ءتىپتى شىڭجاڭ كينو ونەرىن جاقىنىراق تانۋىنا ايتارلىقتاي جاردەمى بولماق.
ەكى اپتاعا جالعاساتىن «شىڭجاڭ كينو اپتالىعى» شەڭبەرىندە الماتى قالاسىنىڭ «كينوپارك»، «ارمان» ءتارىزدى 5 كينوتەاترىندا ءار الۋان تاقىرىپتاعى جانە قويۋ ۇلتتىق ەرەكشەلىككە يە كينو تۋىندىلار كورسەتىلەتىن بولادى.
«شىڭجاڭ كينو اپتالىعى» اياسىندا وقيعالارى شىنايى ومىردەن الىنىپ، شەكسىز ماحابباتتى جىرلايتىن «شىنايى ماحاببات» ءفيلمى، اقىندىقتى اسقاق مۇرات تۇتقان قازاق قىزىنىڭ ايتىس ونەرىن ورگە سۇيرەر سۇلۋ جان-دۇنيەسى سۋرەتتەلگەن «گۇلبيكە» ءفيلمى، شىڭجاڭ جاسوسپىرىمدەرىنىڭ جاستىق رۋحىن جىگەرلەندىرۋگە باعىتتالعان «ارمان اسۋى» ءفيلمى، جانە اقشا، ادامي قاسيەت، وتباسى، ماحاببات جانە دوستىق تاقىرىبىنداعى «اقشانىڭ الەگى» اتتى كومەديالىق فيلم سەكىلدى تىڭ تۋىندىلار كورەرمەندەر نازارىنا ۇسىنىلادى.
