سەرىك ساعىندىقوۆتىڭ سوزىنە سەنسەك، ونىڭ كورمەگە العان بيلەتتەرى مەن اقشاسىن استانالىق تاكسي جۇرگىزۋشىسى قولدى ەتكەن. جىنىسىن اۋىستىرعان ەركەك پوليسياعا شاعىمدانعانىمەن، ونداعىلار بالەنىڭ ءبارى قىزتەكەنىڭ وزىنەن دەپ وتىر. ءسويتىپ ءوزى كۇدىكتىگە اينالىپ شىعا كەلىپتى. بۇل تۋرالى  كتك  حابارلايدى. 

28 جاستاعى ترانسەكسۋال جىنىسىن اۋىستىرعانىمەن، قۇجات بويىنشا اتى ءجونى - سەرىك ساعىندىقوۆ. ايتۋىنشا، تاڭەرتەڭ تاكسي ۇستاپ ۇيىنە بارماق بولعان. ءبىراق، قىزتەكەنى پاتەرىنە جەتكىزگەن جۇرگىزۋشى، سەرىكتىڭ باعالى زاتتارىن تارتىپ الىپ، كۇش كورسەتىپتى.

سەرىك ساعىندىقوۆ:

-تاكسيشى تارتىپ العان ءامياندا 900 دوللور مەن تەڭگەدەي اقشا بولعان. ءارى «ەكسپو» كورمەسىنە ساتىپ الىنعان بيلەتتەر بار ەدى. ۇيالى تەلەفون مەن جەكە كۋالىگىمدى دە الىپ كەتتى.

اقشاسى مەن قۇجاتىنان ايىرىلعان ترانسگەندەر كەيىن 102-گە قوڭىراۋ شالىپ، بولعان جايتتى ايتقان. ءتارتىپ ساقشىلارى تاكسيشىنى بىردەن ۇستاپتى. ءبىراق، ارتىنان تۇك بولماعانداي جىبەرە سالعان.

سەرىك ساعىندىقوۆ، ترانسسەكسۋال:

-ەسىل اۋداندىق ىشكى ىستەر بولىمىنە باردىم. ارىزىمدى ونداعىلار قابىلداماي قويدى. ۇرلانعان اقشامدى ءبولىسىپ الىپ، تاكسيشىنى جىبەرە سالعان. كەرىسىنشە، مەنى ۇرىپ سوعىپ، قولىما كىسەن سالىپ، بىرنەشە ساعاتقا قاماپ تاستادى. 

ال، تەلەفون، قۇجاتتىڭ بارلىعى بولىمشەدە قالىپ قويىپتى. بۇگىن سەرىك سونى الۋعا بارعان. سويتسە، ءتارتىپ ساقشىلارى دا قىزتەكەنى ىزدەپ ءجۇر ەكەن. ويتكەنى، بارلىق داۋ تاكسي جۇرگىزۋشىسىنەن ەمەس، وسى ترانسەكسۋالدىڭ كەسىرىنەن شىققان دەيدى پوليسەيلەر. ياعني، اراققا سىلقيا تويعان سەرىك كولىكتە ويىنا كەلگەنىن ىستەپ، ءىشىن ءبۇلدىرىپ تاستاپتى. 

-كەلگەن زالالدىڭ كولەمى  30 مىڭ تەڭگە. سونىمەن قاتار بىلاپىت سوزدەر ايتقان. نامىسىنا تيگەن.

جالپى، ەسىلدىڭ سول جاعالاۋىندا تۇراتىن قىزتەكەمەن پوليسەيلەر جاقسى تانىس. ويتكەنى، بۇعان دەيىن دە داۋعا قالىپ، بولىمشەگە تالاي تۇسكەن ەكەن..

وسىلايشا، ترانسگەندەرگە بۇزاقىلىق بابىمەن اكىمشىلىك ءىس قوزعاعان پوليسەيلەر توناۋ وقيعاسىن سەرىكتىڭ ويدان شىعارعانىن ايتادى. سوعان قاراعاندا، ونىڭ شاعىمى بويىنشا ارىز سول كۇيى قابىلدانبايتىن سەكىلدى. كەرىسىنشە، تاكسيشىگە ءتىل تيگىزگەنى ءۇشىن ءوزى  10 تاۋلىككە قامالىپ نەمەسە 20 مىڭ تەڭگە ايىپپۇل تولەۋى مۇمكىن. 

شولۋشى: ايگەرىم تاۋباي