وقو-دا كولىكتى ماس كۇيدە جۇرگىزگەن پروكۋراتۋرا قىزمەتكەرى ۇستالدى، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ. 

وقو-نىڭ پروكۋراتۋرا باسقارماسىنىڭ اعا پروكۋرورى نۇرجان پولاتوۆ ماس كۇيدە كولىك جۇرگىزگەن. ءقازىر ول جازادان قۇتىلۋ ءۇشىن سوتقا ارىز بەرگەن. ول باعدارشامنىڭ تىيىم سالىنعان بەلگىسىنە ءوتىپ كەتكەنى مەن ماس كۇيدە رولگە وتىرعانى ءۇشىن تولتىرىلعان اكىمشىلىك حاتتامالاردىڭ كۇشىن جويعىسى كەلەدى. مامىردىڭ باسىندا شىمكەنت پوليسەيلەرى باعدارشامنىڭ قىزىل تۇسىنە ءوتىپ كەتكەن پروكۋراتۋرا قىزمەتكەرىن توقتاتقان. قۇجاتتاردى تەكسەرۋ كەزىندە پوليسەيلەر ەر ادامنىڭ ىشىمدىك ىشكەنىن بايقاعان. مەدەسينالىق ساراپتاما بۇل دەرەكتى راستاعان. 

بولعان جايتتى پوليسەيلەر ۆيدەوجيتون مەن ۇيالى تەلەفوندارىنا تۇسىرگەن. دەگەنمەن اكىمشىلىك سوت وتىرىسى اشىق كۇيدەن جابىق كۇيگە اۋىستىرىلعان. ال 33 جاستاعى پروكۋراتۋرا قىزمەتكەرى رولدە ءوزى ەمەس، جاقىن تۋىسى وتىرعانىن ايتقان. سوت اكىمشىلىك حاتتامالاردى جارامسىز دەپ تاپتى. دەگەنمەن ۆيدەودا جاعدايدىڭ باسقاشا بولعانىن كورۋگە بولادى. 

ۆيدەودا پولاتوۆ نۇرجان سالىحان ۇلى ينسپەكتورعا جۇرگىزۋشى كۋالىگىن بەرە وتىرىپ، بولعان جاعداي ءۇشىن كەشىرىم سۇراپ جاتقانى، قوبالجىپ تەمەكى شەككەنى جانە ساراپتاما قورىتىندىسىنا قول قويعانى كورىنىپ تۇر. اكىمشىلىك سوت بۇل ۆيدەونى نازارعا المادى. 

سوت شەشىمى ءالى زاڭدى كۇشىنە ەنگەن جوق جانە تاراپتاردىڭ شەشىمدى وزگەرتۋ ءۇشىن ارىز بەرۋلەرىنە ۋاقىتى بارىن ايتا كەتەيىك.