جەزقازعان ماڭىنا قۇلاعان زىمىراننىڭ ءمان-جايى انىقتالدى. جەزقازعان تۇبىنە قۇلاعان زىمىران قيراندىسىندا قاتەرلى گەپتيل جوق، - دەپ حابارلايدى قامشى اقپاراتتىق اگەنتتىگى ق ر تجك رەسمي وكىلى رۋسلان يمانقۇلوۆقا سىلتەمە جاساپ.
14 ماۋسىمدا كەشكى ۋاقىتتا قولدانۋشىلار WhatsApp مەسسەندجەرى ارقىلى جەزقازعان ماڭىنداعى تالاپ اۋىلىنا زىمىران قۇلاعانى تۋرالى حابار تاراعان.
حابارلامادا زىمىران قيراندىسىندا ادام ومىرىنە وتە ءقاۋىپتى حيميالىق ۋلى زات بار دەلىندى. اۋىل تۇرعىندارىنا ەسىك پەن تەرەزەلەردى جابۋ كەرەكتىگى ايتىلدى. بالالاردى كوشەگە شىعارماۋ تۋرالى ەسكەرتىلىدى. بۇل حابارلاماعا بايلانىستى جانە زىمىراننىڭ قۇلاۋى جايىندا ق ر تجك رەسمي وكىلى رۋسلان يمانقۇلوۆ ايتىپ بەردى.
يمانقۇلوۆتىڭ ايتۋىنشا، 14 ماۋسىمدا كەشكى ۋاقىتتا راسىندا دا جەزقازعان ماڭىنا زىمىران قيراندىسى قۇلاعان. "دالادا ءورت بولعانى تۋرالى دەرەك راستالدى، ءورت زىمىراننىڭ وڭدەلگەن قالدىعىنىڭ قۇلاۋى كەزىندە شىققان. الايدا قيراندىدا گەپتيل جوق - بۇل ناقتى مالىمەت. قازىرگى ۋاقىتتا ءورتتى ءسوندىرۋ بويىنشا جانە ونىڭ ەلدى مەكەنگە جاقىنداتپاۋ بويىنشا جۇمىس جۇرگىزىلىپ جاتىر"، - دەپ حابارلادى ول.
شولۋشى: ايگەرىم تاۋباي
پىكىر قالدىرۋ