وبلىستىق ءىىد باسپا ءسوز قىزمەتىنىڭ مالىمەتىنشە، قاراقشى زەينەتكەردىڭ اقشا سالىنعان ءاميانىن الىپ قاشقان. بولعان جاعداي جايىندا پوليسيانىڭ كەزەكشى بولىمىنە جولاۋشىلار حابارلاسىپ، لومونوسوۆ كوشەسىندە قاريانىڭ ءوزىن ناشار سەزىنىپ تۇرعانىن جانە وعان جەدەل جاردەم كومەگى قاجەت ەكەنىن ايتقان. بۇل تۋرالى قامشى اقپاراتتىق اگەنتتىگى پاۆلودار جاڭالىقتارىنا سىلتەمە جاساپ حابارلايدى. 

وقيعا ورنىنا جەتكەن پوليسيا جاساعى بەلگىسىز ەر ادامنىڭ اجەيدىڭ قولىنان ىشىندە 10 000 تەڭگە كولەمىندە اقشاسى بار ءاميانى سالىنعان پاكەتتى جۇلىپ اكەتكەنىن انىقتادى. زارداپ شەگۋشىگە مەديسينالىق كومەك كورسەتىلىپ جاتقاندا تۇرعىندار مەن قىلمىسقا كۋا بولعان ادامداردان سۇراستىرۋ جۇمىستارىن جۇرگىزىلدى.

سول جەردە ورنالاسقان دۇكەننىڭ جانىندا پوليسەيلەرگە شولپان اتتى كەلىنشەك جاقىنداپ، قولىنا پاكەت ۇستاپ ارتىنا جالتاقتاي، اسىعىس جۇگىرىپ بارا جاتقان ەر ادامدى كورگەنىن ايتقان. ول كۇدىكتى ادامنىڭ سىرت كەلبەتىن، ۇستىنە كيگەن كيىمىن سيپاتتاپ بەردى. ناتيجەسىندە پوليسەيلەر ءبىر ساعاتتىڭ ىشىندە كۇدىكتىنى ۇستاپ، ءىىب جەتكىزدى. تەكسەرۋ بارىسىندا ودان زاتتاي ايعاقتار (پاكەت، اقشا سالىنعان ءاميان) الىنىپ، يەسىنە قايتارىلدى.

- كۇدىكتىگە قاتىستى ق ر قك-نىڭ «توناۋ» بابى بويىنشا تەرگەۋ باستالدى. ال كۇدىكتىنى «ءىزى سۋىماي» ۇستاپ، قىلمىستى اشۋعا سەپتىگىن تيگىزگەن كومەكشى شولپان ق ر «قوعامدىق ءتارتىپتى قامتاماسىز ەتۋدە ازاماتتاردىڭ قاتىسۋى تۋرالى» زاڭىنا ازاماتتىق پوزيسيا تانىتقانى ءۇشىن اقشالاي سىياقىمەن ىنتالاندىرىلدى، - دەدى باسپا ءسوز قىزمەتىندە.

شولۋشى: ايگەرىم تاۋباي