ق ر سىرتقى ىستەر ءمينيسترى قايرات ءابدىراحمانوۆ سيريا بويىنشا استانا پروسەسى اياسىنداعى جوعارى دەڭگەيدەگى 5ء-شى حالىقارالىق كەزدەسۋدىڭ قورىتىسىندىن شىعاردى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

«وسى جىلدىڭ باسىندا مەملەكەت باسشىسى نۇرسۇلتان نازاربايەۆتىڭ قولداۋىمەن جانە تىكەلەي قاتىسۋمەن باستالعان پروسەسس ۇلكەن جەتىستىككە جەتتى. استانادا وتكەن كەزدەسۋلەردىڭ ناتيجەسىندە سيرياداعى زورلىق-زومبىلىق ايتارلىقتاي تومەندەدى. حالىقتىڭ بەيبىت ءومىرىن قالپىنا كەلتىرۋ ءۇشىن كوپتەگەن ءىس اتقارىلدى. وعان سيرياداعى سوعىس ءىس-قيمىلدارىن توقتاتۋ رەجىمىنىڭ كەپىلگەر ەلدەرىنىڭ كۇش-جىگەرىمەن قاتار، سيريا ۇكىمەتى مەن قارۋلى وپپوزيسيانىڭ جانجالدى بەيبىت جولمەن شەشۋگە ۇمىتىلىسى، سونىمەن قاتار بۇۇ تارابىنان ۇدايى قولداۋ سەپتىگىن تيگىزدى. قازاقستان كەلىسسوزدەرگە ءوز الاڭىن ۇسىنا وتىرىپ، سيريا حالقىنىڭ  قايعى-قاسىرەتىن جەڭىلدەتۋگە جانە ولاردىڭ بەيبىت ومىرگە ورالۋ ۇمتىلىسىنا كومەك كورسەتۋ ارقىلى زور ۇلەس قوستى. وسىعان بايلانىستى ەلىمىز حالىقارالىق قاۋىپسىزدىك پەن تۇراقتىلىقتى نىعايتۋعا باعىتتالعان كۇش-جىگەرگە جاردەم كورسەتۋىن جالعاستىرا بەرەدى. ءبىزدىڭ ەلىمىزدىڭ ساياساتى بۇكىل الەمدەگى ديالوگتى، ءوزارا تۇسىنىستىك پەن بەيبىتشىلىكتىڭ تۇراقتىلىعىن نىعايتۋعا باعىتتالعان. وسىعان وراي قازاقستان اتالعان داعدارىستى ساياسي رەتتەۋگە قول جەتكىزۋ ءۇشىن بەيبىت ساياساتىن جالعاستىرا بەرەدى. مۇددەلى تاراپتار اراسىنداعى كەلىسسوزدەر ءۇشىن تۇعىرناما ۇسىناتىن بولادى»، - دەدى قايرات ءابدىراحمانوۆ.

ونىڭ ايتۋىنشا، سيريا بويىنشا استانا پروسەسى اياسىنداعى بۇگىنگى  جوعارى دەڭگەيدەگى 5ء-شى حالىقارالىق كەزدەسۋ سيرياداعى سوعىستى توقتاتۋ رەجىمىن نىعايتۋعا باعىتتالعان وڭ ناتيجەلەرمەن اياقتالدى.  كوپتەگەن ماسەلە تالقىلانىپ، تاراپتار اراسىندا ناقتى ۋاعدالاستىقتارعا قول جەتكىزىلدى جانە الداعى ۋاقىتتاعى كەلىسسوزدەردىڭ جوسپارى قارالدى.

«ءبىز سيريالىق جانجالدىڭ اسكەري شەشىمى جوق ەكەندىگىنە اركەز سەندىك. سوندىقتان ديالوگ - بۇل بەيبىتشىلىكتىڭ جالعىز جولى عانا. اسكەري شەشىم سيريا حالقىنا مۇنان دا زور قاسىرەت اكەلىپ، وڭىرلىك جانە حالىقارالىق تاراپتار اراسىنداعى جاڭا قاراما-قايشىلىقتاردى تۋىنداتادى»، - دەدى قازاقستان سىرتقى ىستەر ءمينيسترى.

سونىمەن قاتار ول بۇگىن استانا پروسەسىنە قاتىسۋشىلار سيريا جەرىندە بەيبىتشىلىك پەن تۇراقتىلىق ورناتۋعا  تاعى دا ءبىر ماڭىزدى قادام جاساعاندىعىن باسا ايتتى.