باتىس قازاقستان وبلىسىندا 45 مەملەكەتتىك مەديسينالىق ۇيىم بار. ونىڭ 28ء-ى ءدارىحانالىق ۇيىم، سونىڭ ىشىندە ءتورت ديسپانسەر، 12 ورتالىق اۋداندىق، ءۇش اۋداندىق اۋرۋحانا، ءبىر «اۋدانارالىق ساۋىقتىرۋ اۋرۋحاناسى» وڭالتۋ ورتالىعى جانە سەگىز اۋرۋحانا بار. سونداي-اق التى دەربەس امبۋلاتورلىق-ەمحانالىق، 11 باسقا دا مەديسينالىق ۇيىم بولسا، ورتالىق اۋداندىق جانە اۋداندىق اۋرۋحانالار قۇرامىنا كىرەتىن ءبىر اۋىلدىق اۋرۋحانا جانە 60 دارىگەرلىك امبۋلاتوريا، 61 فەلدشەرلىك-اكۋشەرلىك جانە 221 مەديسينالىق پۋنكت جۇمىس جاسايدى. ال دەنساۋلىق ساقتاۋ سالاسىنىڭ دامۋىن بىلىكتى ماماندار مەن الەمدىك تاجىريبەسىز ەلەستەتۋ مۇمكىن ەمەس. سوندىقتان وبلىستىڭ مەديسينا ۇيىمدارىنىڭ دارىگەرلەرى جوسپارعا سايكەس ەلىمىزدەگى جوعارى مەديسينالىق وقۋ ورىندارىندا بىلىكتىلىكتەرىن ارتتىرۋدا، سونىمەن قاتار، قاجەتتىلىككە وراي جاقىن جانە الىس شەتەلدەردە تاجىريبە الماسۋعا جاعداي جاسالعان. ايتا كەتسەك، جۋىردا وبلىستىق دەنساۋلىق ساقتاۋ سالاسىنىڭ جۇمىسىن دامىتۋ، تاجىريبە الماسۋ ماقساتىندا وڭىرگە 12 ءتۇرلى سالاسىنىڭ بىلىكتى دارىگەرلەرى كەلىپ، شەبەرلىك سىنىبىن وتكىزدى. ولاردىڭ قاتارىندا اتىراۋ كلينيكاسىنىڭ دارىگەرى ر. مەدەۋبايەۆ، م. وسپانوۆ اتىنداعى №1 بقممۋ-دىڭ اكۋشەرلىك جانە گينەكولوگيا كافەدراسىنىڭ جەتەكشىسى س.رىجكوۆا، دەرماتوۆەنەرولوگ ر. الييەۆ، ج.دوسىموۆ، ۇلتتىق عىلىمي كارديوحيرۋرگيالىقلىق ورتالىق دارىگەرلەرى ا.مەدرەسوۆا مەن ت.نۇرمۇحامبەتوۆ جانە ەلىمىزدەگى بىلىكتى پسيحياترلارى مەن پسيحولوگ ماماندارى بار. سونداي-اق گەرمانيادان تاجىريبەلى دارىگەر ح.حويمان كەلىپ، قۇلاعىنىڭ مۇكىسى بار ناۋقاستارعا 13 وتا جاسادى.
-«دارىگەرلەر دەسانتىن» ءبىزدىڭ وڭىرگە ءبىرىنشى رەت وسىلاي توپ بولىپ كەلىپ، تۇرعىندارعا قىزمەت كورسەتتى. ناۋقاستارعا وتا جاساپ، ەمدەۋ بويىنشا ءتيىمدى كەڭەستەر بەردى. دارىگەرلەردىڭ توپ بولىپ كەلىپ، وڭىرىمىزدە شەبەرلىك سىنىبىن وتكىزۋى ءبىزدىڭ جەرگىلىكتى دارىگەرلەرگە جانە ناۋقاستارعا ۇلكەن كومەك دەپ ەسەپتەيمىن. ويتكەنى دارىگەرلەردىڭ بىلىكتىلىگىن كوتەرۋ ءۇشىن ون شاقتى دارىگەرگە قاراجات ءبولىپ، ءىسساپارعا جىبەرگەننەن گورى «دارىگەرلەر دەسانتىن» وزىمىزدە قابىلداعان الدەقايدا ءتيىمدى. ءبىر جاعىنان، سالانى دامىتۋعا ارنالعان قاراجاتتى ۇنەمدەيمىز، ەكىنشى جاعىنان، دارىگەرلەرىمىز ءوز ورنىندا وتىرىپ، حالىققا پايدالى ءىس جاسايدى. ۇشىنشىدەن، سىرتتان كەلگەن بىلىكتى دارىگەرلەردىڭ تاجىريبەسىن ونىڭ وسىنداعى شەبەرلىك سىنىبىنا قاتىسقان جەرگىلىكتى دارىگەرلەردىڭ بارلىعى كورىپ، ۇيرەنەدى. سوندىقتان يگىلىكتى ءىس جاساپ جۇرگەن مۇنداي «دارىگەرلەر دەسانتىن» بۇدان كەيىن دە قابىلداۋعا ءارقاشان دايىنبىز،- دەدى وبلىستىق دەنساۋلىق ساقتاۋ باسقارماسىنىڭ باسشىسى قانات توسەكبايەۆ.
گۇلىم اقاپ،
باتىس قازاقستان وبلىسى
پىكىر قالدىرۋ