رەسەي استاناسىندا جۇزدەگەن مۇسىلمان ميانمادا ەتنيكالىق روحيندجا توبىن قۋدالاۋعا نارازىلىق ءبىلدىرىپ، قالا ورتالىعىندا رۇقسات ەتىلمەگەن اكسياعا شىققان. رەسەيلىك "دوجد" تەلەارناسىنىڭ حابارلاۋىنشا، ماسكەۋدەگى ميانما ەلشىلىگى جانىنا جينالعان نارازىلار "اللاحۋ اكبار!" دەپ ايعايلاعان. ول جەردە تۇرعان پوليسيا وكىلدەرى نارازىلىق اكسياسىنا ارالاسپاي، سىرتتاي باقىلاپ تۇرعان. بۇل تۋرالى Qamshy.kz اقپارات اگەنتتىگى azattyq.org مالىمەتىنە سۇيەنىپ حابارلايدى.
تۇرعىندارىنىڭ باسىم بولىگى بۋدديزم ءدىنىن ۇستاناتىن ميانما رەسپۋبليكاسىندا مۇسىلمان روحيندجالار جەرگىلىكتى بيلىك تاراپىنان قىسىم كورىپ وتىر. ەتنيكالىق از توپتىڭ 75 مىڭنان استام وكىلى جاقىندا ەلدەن قاشۋعا ءماجبۇر بولعان. ميانمادا سوڭعى اپتالاردا بۋدديستەر مەن مۇسىلماندار اراسىنداعى قاقتىعىستار سالدارىنان 400-دەن استام ادام مەرت بولعان.
رەسەي قۇرامىنداعى شەشەنستاننىڭ باسشىسى رامزان قادىروۆ ميانماداعى مۇسىلمانداردى قۋدالاۋشىلاردى ايىپتاعان. شەشەنستانمەن كورشى داعىستاندا روحيندجالاردى قولداۋ اكسياسى وتكەن.
رەسەي سىرتقى ىستەر مينيسترلىگى ميانماداعى جاعدايعا ماسكەۋدىڭ "مۇقيات نازار اۋدارىپ" وتىرعانى تۋرالى مالىمدەپ، جانجالعا قاتىسۋشى تاراپتاردى ديالوگ ورناتۋعا شاقىرعان.
