ورال قالاسىنداعى «اربا» قوعامدىق بىرلەستىگىنىڭ ءتورايىمى گۇلميرا باتپاقۇلوۆا اربامەن قوزعالاتىن مۇمكىندىگى شەكتەۋلى ءعارىپ جانداردىڭ مۇڭ-مۇقتاجىن جاقسى بىلەدى. سونداي-اق ول مۇمكىندىگى شەكتەۋلىلىگىنە قاراماستان جارىستارعا بەلسەنە اتسالىسادى جانە ءوز ارباسىمەن جۇزدەگەن شاقىرىمدى ءجۇرىپ ءوتتى، پاراشيۋتپەن دە سەكىرگەن بولاتىن.

سونىمەن قاتار گۇلميرا باتپاقۇلوۆا باتىس قازاقستان وبلىسىنىڭ قوعامدىق ومىرىنە بەلسەنە اتسالىسادى. «قارسىلاستارىمنان وزعان جەڭىسىمە ەمەس، ءوز-وزىمدى جەڭە العان  تابىسىما ماقتانامىن»، - دەيدى گۇلميرا باتپاقۇلوۆا. كەيىپكەرىمىزدى  17 جاسىندا كولىك قاعىپ كەتكەن. سول جول اپاتىنان كەيىن اياعىنان تۇرىپ كەتە الماعان. ول قانشا قيىندىق كورسە دە، مويىماعان. قايتا ءوز بەتىنشە ءومىر سۇرۋگە بەيىمدەلىپ، ورالدا "اربا" قوعامدىق بىرلەستىگىن قۇردى. ءقازىر ءوزى سياقتى مۇمكىندىگى شەكتەۋلى جانداردىڭ جۇمىس ىستەۋىنە بارىنشا كومەكتەسىپ كەلەدى. ونىڭ ايتۋىنشا، بۇگىنگى تاڭدا مۇمكىندىگى شەكتەۋلى جانداردىڭ ءومىر ءسۇرۋ ساپاسىن كوتەرۋ ماسەلەسى جۇيەلى شەشىلە باستاعان.  

«قالانىڭ ينفراقۇرىلىمى مۇگەدەكتەر ارباسىمەن قوزعالاتىن ادامداردىڭ بارلىعى ءۇشىن قولجەتىمدى بولدى. بىزگە جاڭا جاي بەرىپ، ورتالىق اشتىق، وندا قولونەر، توقىما ۇيىرمەسى، كومپيۋتەرى سىنىبى، تىگىن سەحى جۇمىس ىستەيدى»، - دەيدى «اربا» قب ءتورايىمى گۇلميرا باتپاقۇلوۆا. قايسار جان قوعامدىق بىرلەستىكتى اشا وتىرىپ، جۇمىس ورىندارىن قۇردى. مىسالى، بۇگىنگى كۇنى «اربا» قوعامدىق بىرلەستىگىندە دەنساۋلىعىنا بايلانىستى 10 مۇمكىندىگى شەكتەۋلى ادام ەڭبەك ەتۋدە.

قىزمەتكەرلەر بۇل جەردە جۇمىس ىستەي ءجۇرىپ، حالىققا قاجەتتى بۇيىم جاساپ، وزدەرىن قاجەتسىز بولىپ سەزىنگەن سەزىمدەرىنەن دە ارىلعاندارىن ايتادى.

-ورتالىققا جۇمىسقا تۇرعانعا دەيىن مەن تۇيىق ادام بولدىم. ءقازىر بۇرىنعاعا قاراعاندا اشىلىپ، جۇرتپەن تەز ءتىل تابىسا باستادىم. ورتالىق مەنىڭ ءومىرىمدى  جاقسى ارناعا قاراي بۇرىپ اكەتكەنىن تولىق  سەنىممەن ايتا الامىن. بۇل جەردە ومىرگە جانە ءبىر نارسەنى جاساۋعا دەگەن ىنتا پايدا بولادى، - دەيدى بىرلەستىكتىڭ قىزمەتكەرى راۋشان سۇلەيمەنوۆا.

گۇلىم اقاپ،

باتىس قازاقستان وبلىسى