الماتىدا قالا اكىمى باۋىرجان بايبەك پەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ەلباسى كىتاپحاناسىنىڭ «ن. نازاربايەۆ: ءداۋىر، تۇلعا، قوعام» كوشپەلى عىلىمي ءبىلىم بەرۋ جانە مادەني-اعارتۋشىلىق كورمە جوباسىنىڭ اشىلۋىنا قاتىستى، دەپ حابارلايدى Qamshy.kz اقپارات اگەنتتىگى.
ۇيىمداستىرۋشىلاردىڭ ايتۋىنشا، جوبانىڭ ءىس-شارالارى قازاقستان رەسپۋبليكاسى تۇڭعىش پرەزيدەنتىنىڭ كۇنى جانە تاۋەلسىزدىك كۇنى مەملەكەتتىك مەرەكەلەرىنە وراي جۇزەگە اسىرىلادى.
ەلىمىزدىڭ استاناسىن كوشىرگەن ساتتەن بەرى 20 جىلدىڭ ىشىندە العاش رەت مەملەكەت باسشىسىنىڭ جەكە ءارحيۆى، جەكە كىتاپحاناسى جانە مۋزەيى قورىنىڭ زەرتتەۋ ناتيجەلەرى مەن ماتەريالدارى الماتى قالاسىنىڭ قالىڭ جۇرتشىلىعىنىڭ نازارىنا ۇسىنىلىپ وتىر.
كەلۋشىلەردىڭ نازارىنا كىتاپحانانىڭ ءارحيۆى، كىتاپ، مۋزەي قورلارىنىڭ سيرەك جادىگەرلەرى، ەلباسىنىڭ جوعارى مەملەكەتتىك ماراپاتتارى، قۇراندار كوللەكسياسى، وزگە مەملەكەت باسشىلارىنىڭ قولتاڭباسىمەن كىتاپتار، ن. نازاربايەۆتىڭ شەت تىلىندەگى كىتاپتارى قويىلدى.
جوبا اتالمىش كوشپەلى قور كورمەسىنىڭ سالتاناتتى اشىلۋ راسىمىنەن باستالدى. كورمەنىڭ نەگىزگى ماقساتى – قازاقستان رەسپۋبليكاسى تۇڭعىش پرەزيدەنتى – ەلباسىنىڭ تاۋەلسىز قازاقستان تاعدىرىنداعى ءرولىن مۇراعات قۇجاتتارى مەن جادىگەرلەر ارقىلى جۇيەلى تۇردە كەڭىنەن كورسەتۋ بولىپ تابىلادى.
كورمەنىڭ اشىلۋ راسىمىنە قازاقستان رەسپۋبليكاسى پرەزيدەنتى كەڭەسىنىڭ باستىعى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ مىندەتىن اتقارۋشى ماحمۇت قاسىمبەكوۆ، قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى، الماتى قالاسىنىڭ اكىمى باۋىرجان بايبەك سىندى بەدەلدى ازاماتتار قاتىسىپ، ءسوز سويلەدى.
بۇگىنگى كورمەگە استاناداعى ەلباسى مۋزەيىنەن 800 ءتۇپنۇسقا قولجازبا، سۋرەتتەر جانە جەكە زاتتارى اكەلىندى.
«الماتى – مەملەكەت باسشىسىنىڭ تۇلعاسىمەن تىكەلەي بايلانىستى قالا. مۇندا قازاقستان تاۋەلسىز مەملەكەت بولىپ جاريالاندى، كونستيتۋسيا قابىلداندى، مەملەكەتتىك رامىزدەر بەكىتىلدى، ۇلتتىق ۆاليۋتا ەنگىزىلدى. سونداي-اق، قازاقستان پرەزيدەنتىنىڭ تۇڭعىش سايلاۋى، العاشقى ۇلىقتاۋ ءراسىمى بولىپ ءوتتى. سوندىقتان، ەلباسى كۇنى قارساڭىندا مۇنداي اۋقىمدى شارانىڭ ءوتۋى – الماتىلىقتار ءۇشىن ۇلكەن مارتەبە»، - دەدى قالا اكىمى باۋىرجان بايبەك.
«بۇگىن ق ر تۇڭعىش پرەزيدەنتى – ەلباسى كىتاپحاناسى ءۇشىن تاريحي كۇن. سەبەبى، العاش رەت ەلوردامىز الماتى قالاسىنان اقمولاعا اۋىسقاننان بەرى قۇندى دەرەكتەر جۇيەلەنىپ، ارنايى كورمەلىك جوبا رەتىندە الماتىلىقتارعا جانە قالا قوناقتارىنا ۇسىنىلىپ وتىر. ءتورت تاقىرىپ بولىكتەگى ۇسىنىلعان تۇڭعىش پرەزيدەنت مۋزەيىنىڭ، جەكە كىتاپحاناسىنىڭ، جەكە مۇراعاتىنىڭ جادىگەرلەرى كەلۋشىلەرگە قالىپتاسقان تاۋەلسىزدىك تاريحىمىزبەن قاتار سول تاۋەلسىزدىكتىڭ باستى جاۋاپكەرشىلىگىن ءوز مويىنىنا ارتقان ەلباسى ومىربايانىمەن جانە سىرتقى، ىشكى ساياسي قىزمەتىمەن تەرەڭىنەن تانىستىراتىن بولادى. بۇل – العاشقى كورمەلىك اۋقىمدى جوبا.
ق ر تۇڭعىش پرەزيدەنت مۋزەيى مەن ەلباسى كىتاپحاناسى 2016 جىلعى 4 قاراشاداعى ەلباسىنىڭ جارلىعى بويىنشا بىرىگىپ، قازىرگى ۋاقىتتا بىرلەسكەن تاۋەلسىزدىك تاريحىمىزدى جان-جاقتى زەردەلەۋ جانە كوپشىلىككە، اسىرەسە، جاستارعا جاريا ەتۋ قىزمەتىن جالعاستىرۋدا. جالپى، كوشپەلى كورمەلەردى ۇيىمداستىرۋ تاجىريبەسى وسى كۇنگە دەيىن كاسىبي تۇردە قالىپتاسقانىمەن، اۋقىمدى، جۇيەلى، سونىمەن قاتار ىشىندە عىلىمي سەمينار-كونفەرەنسيالارى بار جوبا العاش رەت ۇيىمداستىرىلىپ وتىر»، - دەيدى ق ر تۇڭعىش پرەزيدەنتى – ەلباسى كىتاپحاناسىنىڭ ديرەكتور ورىنباسارى، تاريح عىلىمدارىنىڭ كانديداتى قايىپوۆا بوتاگوز.
بەلگىلى بولعانداي، كوشپەلى كورمە الماتىدا ەكى اي ۋاقىت تۇرادى دا، كەيىن قاراعاندى مەن شىمكەنت قالالارىنا كەتەدى ەكەن.
سونىمەن قاتار، مادەنيەت ءمينيسترى مەن قالا اكىمى ەلباسى نۇرسۇلتان نازاربايەۆتىڭ ەل دامۋىنداعى ءرولى جايلى وتەتىن عىلىمي پراكتيكالىق كونفەرەنسيا جۇمىسىنا قاتىسادى.
