بۇگىن اقتوبەدە "مۇناي ۇرلاۋمەن اينالىسقان قىلمىستىق توپ" دەگەن كۇدىكپەن ۇستالعان 26 ادامنىڭ ءىسى بويىنشا نەگىزگى سوت پروسەسى باستالدى. تەرگەۋ قورىتىندىسى بويىنشا ولارعا اۋىر جانە اسا اۋىر قىلمىستار جاساعان دەگەن ايىپتار تاعىلعان. سوت اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتىر. جۋرناليستەر سوت بارىسىن جەكە بولمەدە مونيتوردان باقىلاپ وتىر، دەپ Qamshy.kz اقپارات اگەنتتىگى ازاتتىققا سىلتەپ جازادى.
"قىلمىستىق توپقا جەتەكشىلىك ەتكەن" ءبىرىنشى توپ مۇگەدەگى ەركىن ءىزباساردى تەرگەۋ قىلمىستىق كودەكستىڭ 13 ءتۇرلى بابى بويىنشا ايىپتاپ وتىر. سوتتالۋشىلاردىڭ 17ء-سى تەرگەۋ يزولياتورىندا، ال 9-ى ەشقايدا شىقپاۋ تۋرالى قولحاتپەن بوستاندىقتا ءجۇر. سوتتالۋشىلار اراسىندا وبلىستىق ىشكى ىستەر دەپارتامەنتى باسشىسىنىڭ بۇرىنعى ورىنباسارى دا بار.
ەركىن ءىزباسار مەن ونىڭ سەرىكتەرىنە تاعىلىپ وتىرعان تاعى ءبىر ۇلكەن ايىپ – مۇناي ۇرلىعى. تەرگەۋ ماتەريالدارىنا قاراعاندا، "ساعىز پەترولەۋم" كومپانياسىنا قاراستى "قاعاناي" كەنىشىنەن 2015 جىلعى ماۋسىم-قىركۇيەك ارالىعىندا 530 توننا مۇناي ۇرلانعان. ۇرلانعان مۇناي قۇنى 11 ميلليون 302 مىڭ تەڭگە ەكەندىگى ايتىلادى. ودان بولەك، بايعانين اۋدانىنداعى "اششىكول"، مۇعالجار اۋدانىنداعى "سينەلنيكوۆسكوە" كەنىشى مەن بايعانين اۋدانىنداعى "قاراتوبە" كەنىشىنەن دە ءار جىلدارى اسا كوپ مولشەردە مۇناي ۇرلانعان. ازىرشە، ۇرلانعان مۇنايدىڭ ناقتى كولەمى مەن كەلتىرىلگەن شىعىن مولشەرى ايتىلعان جوق.
2016 جىلدىڭ جەلتوقسانىندا ۇقك قىزمەتكەرلەرى مەن كوررۋپسياعا قارسى ءىس-قيمىل ۇلتتىق بيۋروسى جانە ىشكى ىستەر مينيسترلىگى بىرلەسىپ اقتوبە وبلىسى جانە تاعى كەي وبلىستاردا "مۇناي ونىمدەرىن جىمقىرۋمەن اينالىسقان" دەگەن كۇدىكتى توپتى قولعا ءتۇسىرۋ وپەراسياسىن جۇرگىزگەن. كەيىن سوت وپەراسيا بارىسىندا ۇستالعان جيىرمادان استام كۇدىكتىنى قاماۋعا سانكسيا بەرگەن.
ۇقك سونىمەن قاتار "مۇناي ۇرلاۋمەن اينالىسقانداردى قورعاشتاعان راديكالدى سالافيزم باعىتىن ۇستاناتىن قىلمىستىق توپتىڭ بىرنەشە مۇشەسى ۇستالعانى" تۋرالى دا حابارلاعان.
پىكىر قالدىرۋ